จุนฺโท ยถา นาคทนฺตํ ขเรนาติ ฯ

ตตฺถ ตฺวมนุตฺตโรสีติ ตฺวํ อนุตฺตโรสิ นตฺถิ ตยา อุตฺตริตโร นาม ฯ ธมฺมคูติ ธมฺมสฺส โคปโก เจว ธมฺมญฺญู จ ฯ ธมฺมวิทูติ ปากฏธมฺโม ฯ สุเมโธติ สุนฺทรปญฺโญ ฯ ปญฺญายาติ อตฺตโน ปญฺญาย อมฺหากํ ปญฺหํ สุฏฺฐุ อติคณฺหิตฺวา อิทเมตฺถ การณนฺติ ยถาภูตํ ญตฺวา ฯ อจฺเฉจฺฉาติ ตฺวํ ธีโร อมฺหากํ วิจิกิจฺฉิตานิ ฉินฺท เอวํ ฉินฺทนฺโต จ ฉินฺทชฺช กงฺขํ วิจิกิจฺฉิตานีติ อิมํ อมฺหากํ อายาจนํ สมฺปาเทนฺโต ฯ จุนฺโท ยถา นาคทนฺตํ ขเรนาติ ยถา ทนฺตกาโร สกฺกจฺเจน หตฺถิทนฺตํ ฉินฺเทยฺย เอวํ ฉินฺทาติ อตฺโถ ฯ

เอวํ เต จตฺตาโรปิ ตสฺส ปญฺหาพฺยากรเณน ตุฏฺฐมานสา อเหสุํ ฯ อถ นํ สกฺโก ทิพฺพทุกุเลน ปูเชสิ ครุโฬ สุวณฺณมาลาย ปูเชสิ วรุณนาคราชา มณินา ปูเชสิ ธนญฺชยราชา ควสหสฺสาทีหิ ปูเชสิ ฯ เต เอวมาหํสุ

นีลุปฺปลาภํ วิมลํ อนคฺฆํ