จตุโปสถกณฺฑํ นิฏฺฐิตํ ฯ

เตสุ นาคราชสฺส ภริยา วิมลาเทวี นาม ฯ สา ตสฺส คีวายํ ปิลนฺธนมณึ อปสฺสนฺตี ปุจฺฉิ เทว กุหึ ปน เต มณีติ ฯ ภทฺเท จนฺทพฺราหฺมณปุตฺตสฺส วิธุรปณฺฑิตสฺส ธมฺมกถํ สุตฺวา ปสนฺนจิตฺโต อหํ เตน มณินา ตํ ปูเชสึ น เกวลญฺจ อหเมว สกฺโกปิ นํ ทิพฺพทุกุเลน ปูเชสิ สุปณฺณราชา สุวณฺณมาลาย ปูเชสิ ธนญฺชยราชา ควสหสฺสาทีหิ ตํ ปูเชสีติ ฯ วิมลา ธมฺมกถิโก โส เทวาติ ภทฺเท กึ วเทสิ สกลชมฺพูทีปตเล พุทฺธุปฺปาทกาโล วิย ปวตฺตติ สกลชมฺพูทีเป เอกสตราชาโน ตสฺส มธุรธมฺมกถาย พชฺฌิตฺวา หตฺถิกนฺตวีณาสเรน ปลุทฺธา มตฺตวรวารณา วิย อตฺตโน อตฺตโน รฏฺฐานิ น คจฺฉนฺติ เอวรูโป โส มธุรธมฺมกถิโกติ ตสฺส คุณํ วณฺเณสิ ฯ สา วิธุรปณฺฑิตสฺส คุณกถํ สุตฺวา ตสฺส ธมฺมกถํ โสตุกามา หุตฺวา จินฺเตสิ สจาหํ วกฺขามิ เทว อหํ ตสฺส ธมฺม กถํ โสตุกามา อิเธว นํ อาเนหีติ น เม ตํ อาเนสฺสติ ยนฺนูนาหํ ตสฺส หทเย โทหโฬ เม อุปฺปนฺโนติ คิลานาลยํ กเรยฺยนฺติ ฯ สา ตถา กตฺวา ปริจาริกานํ สญฺญํ ทตฺวา สิริสยเน นิปชฺชิ ฯ นาคราชา อุปฏฺฐานเวลาย ตํ อปสฺสนฺโต ปุจฺฉติ กุหึ วิมลาติ ฯ ปริจาริกาหิ คิลานา เทวาติ วุตฺเต โส อุฏฺฐายาสนา ตสฺสา สนฺติกํ คนฺตฺวา สยนปสฺเส นิสีทิตฺวา ตสฺสา สรีรํ ปริมชฺชนฺโต ปฐมํ คาถมาห

ปณฺฑุ กีสิยาสิ ทุพฺพลา

วณฺณรูเป น ตเวทิสํ ปุเร