ทุลฺลเภ หิ วิธุรสฺส ทสฺสเน

โก วิธุรํ อิธ อานยิสฺสตีติ ฯ

ตตฺถ ทุลฺลเภหิ วิธุรสฺส ทสฺสเนติ อสมธุรสฺส วิธุรสฺส ทสฺสนเมว ทุลฺลภํ ฯ ตสฺส หิ สกลชมฺพูทีปราชาโน ธมฺมิกํ รกฺขาวรณคุตฺตึ ปจฺจุปฏฺฐเปตฺวา วิจรนฺติ ฯ ปสฺสิตุํปิ นํ โกจิ น ลภติ ตํ อิธ โก อานยิสฺสตีติ ฯ

สา ตสฺส วจนํ สุตฺวา อลภมานาย เม อิเธว มรณนฺติ ปริวตฺติตฺวา ตสฺส ปิฏฺฐึ ทตฺวา สาฏกกณฺเณน มุขํ ปิทหิตฺวา นิปชฺชิ ฯ นาคราชา อตฺตโน สิริคพฺภํ คนฺตฺวา สยนปิฏฺเฐ นิสินฺโน วิมลา วิธุรสฺส หทยมํสํ อาหราเปตีติ สญฺญี หุตฺวา ปณฺฑิตสฺส หทยํ อลภนฺติยา วิมลาย ชีวิตํ นตฺถิ กถนฺนุ โข ตสฺส หทยมํสํ ลภิสฺสามีติ จินฺเตสิ ฯ อถสฺส ธีตา อิรนฺทตี นาม นาคกญฺญา สพฺพาลงฺการปฏิมณฺฑิตา มหนฺเตน สิริวิลาเสน ปิตุ อุปฏฺฐานํ อาคตา ปิตรํ วนฺทิตฺวา เอกมนฺตํ ฐิตา ปิตุ อินฺทฺริยวิการํ ทิสฺวา ตาต อติวิย โทมนสฺสปฺปตฺโตสิ กินฺนุ โข การณนฺติ ปุจฺฉนฺตี คาถมาห