เก ปณฺฑิเต สพฺพกามทเท

ทีฆรตฺตํ ภตฺตา เม ภวิสฺสตีติ ฯ

ตตฺถ เก คนฺธพฺเพ จ รกฺขเส นาเคติ โก คนฺธพฺโพ วา รกฺขโส วา นาโค วา ฯ เก ปณฺฑิเต สพฺพกามทเทติ โก เอเตสุ คนฺธพฺพาทีสุ ปณฺฑิโต สพฺพกามํ ทาตุํ สมตฺโถ โย วิธุรสฺส ทหยมํสํ โทหฬนิยา มม มาตุ มโนรถํ มตฺถกํ ปาเปตฺวา มยฺหํ ทีฆรตฺตํ ภตฺตา ภวิสฺสตีติ ฯ

ตสฺมึ ขเณ เวสฺสวณมหาราชสฺส ภาคิเนยฺโย ปุณฺณโก นาม ยกฺขเสนาปติ ติคาวุตปฺปมาณํ มโนมยสินฺธวํ อภิรุหิตฺวา กาฬปพฺพตมตฺถเก มโนสิลาตเล ยกฺขสมาคมํ คจฺฉนฺโต ตํ ตสฺสา คีตสทฺทํ อสฺโสสิ ฯ อนนฺตเร อตฺตภาเว อนุภูตปุพฺพาย อิตฺถิยา คีตสทฺโท ฉวิอาทีนิ ฉินฺทิตฺวา อฏฺฐิมิญฺชํ อาหจฺจ อฏฺฐาสิ ฯ โส ปฏิพทฺธจิตฺโต หุตฺวา อสฺสํ ปริวตฺติตฺวา สินฺธวปิฏฺเฐ นิสินฺโนว ภทฺเท อหํ มม ปญฺญาย ธมฺเมน สเมน วิธุรสฺส หทยํ อาเนตุํ สมตฺโถ มา จินฺตยีติ ตํ อสฺสาเสนฺโต อฏฺฐมํ คาถมาห