ตตฺถ เทววาหวหนฺติ วหิตพฺโพ วาโห เทวสํขาตํ วาหํ วหตีติ เทววาหวโห ฯ ยานนฺติ นยนฺติ คจฺฉนฺติ เอเตนาติ ยานํ ฯ กปฺปิตเกสมสฺสูติ มณฺฑนวเสน สุสํวิหิตเกสมสฺสุ ฯ เทวานํ ปน เกสมสฺสุกมฺมํ นาม นตฺถิ วิจิตฺตกถิเตน กถนฺติ ฯ ชิคึสนฺติ ปตฺถยนฺโต ฯ เวสฺสวณนฺติ วิสานาย ราชธานิยา อิสฺสรราชานํ ฯ กุเวรนฺติ เอวํ นามกํ ฯ โภควตี นามาติ สมฺปนฺนโภคตาย เอวํ ลทฺธนามํ ฯ มนฺทิเรติ มนฺทิรํ ภวนนฺติ อตฺโถ ฯ วาสา หิรญฺญวตีติ นาคราชสฺส วสนฏฺฐานตฺตา วาสาติ จ กาญฺจนวติยา สุวณฺณปากาเรเนว ปริกฺขิตฺตตฺตา หิรญฺญวตีติ จ วุจฺจติ ฯ นคเร นิมฺมิเตติ นครํ นิมฺมิตํ ฯ กาญฺจนมเยติ สุวณฺณมยํ ฯ มณฺฑลสฺสาติ โภคมณฺฑเลน สมนฺนาคตสฺส ฯ นิฏฺฐิตนฺติ กรณปรินิฏฺฐิตํ ฯ โอฏฺฐคีวิโยติ โอฏฺฐคีวสณฺฐาเนน กตา ฯ โลหิตงฺคสฺส มสารคลฺลิโนติ รตฺตมณิมยา มสารคลฺลมยา อฏฺฏาลกา ฯ ปาสาเทตฺถาติ เอตฺถ นาคภวเน ปาสาทา ฯ สิลามยาติ มณิมยา ฯ โสวณฺณรตเนนาติ สุวณฺณสํขาเตน รตเนน สุวณฺณิฏฺฐกาหิ ฉาทิตาติ อตฺโถ ฯ สหาติ สหการา ฯ อุปริ ภณฺฑกาติ ปาริฉตฺตกทุมา ฯ อุทฺทาลกาติ อุทฺทาลกชาติกาเยว รุกฺขา ฯ จมฺเปยฺยกา นาคมลฺลิกาติ จมฺเปยฺยกาจ นาคา จ มลฺลิกา จ ฯ ภคินิมาลา อตฺเถตฺถ โกลิยาติ ภคินีมาลา เจว อตฺถิ เอตฺถ นาคภวเน โกลิยา จ นาม รุกฺขา ฯ เอเต ทุมา ปรินามิตาติ เอเต ปุปฺผูปคา ผลูปคา รุกฺขา อญฺญมญฺญํ สํฆฏสาขา ปรินามิตา อากุลสมากุลา ฯ ขชฺชุเรตฺถาติ ขชฺชุรรุกฺขา เอตฺถ ฯ สิลามยาติ อินฺทนีลมณิมยา ฯ โสวณฺณธุวปุปฺผิตาติ เต ปน สุวณฺณปุปฺเผหิ นิจฺจํ ปุปฺผิตา ฯ ยตฺถ วสโตปปาติโกติ ยตฺถ นาคภวเน อุปปาติโก นาคราชา วสติ ฯ กาญฺจนเวลฺลิวิคฺคหาติ สุวณฺณราสิสสฺสิรีกสรีรา ฯ กาฬา ตรุณาว อุคฺคตาติ วิลาสยุตฺตตาย มนฺทวาเตริตา กาฬวลฺลีปวาลา วิย อุคฺคตา ฯ ปิจุมณฺฑตฺถนีติ นิมฺพผลสณฺฐานถนยุคลา ฯ ลาขารสรตฺตสุจฺฉวีติ หตฺถปาทตลจฺฉวึ สนฺธาย วุตฺตํ ฯ ติทิโวกฺกจราติ ติทสภวนจรา ฯ วิชฺชุวพฺภฆนาติ อพฺภฆนโต ฆนพลาหกนฺตรโต นิสฺสิตา วิชฺชุลตา วิย ฯ ตํ เนสํ ททามีติ ตํ ตสฺส หทยํ อหํ เตสํ เทมิ เอวํ ชานสฺสุ ฯ อิสฺสราติ มาตุลํ อาลปติ ฯ

อิติ โส เวสฺสวเณน อนนุญฺญาโต คนฺตุํ อวิสหิตฺวา ตํ อนุชานาเปตุํ เอตาหิ เอตฺตกาหิ คาถาหิ กเถสิ ฯ เวสฺสวโณ ปน ตสฺส กถํ น สุโณติ ฯ กึ การณาติ ฯ ทฺวินฺนํ เทวปุตฺตานํ วิมานอฏฺฏํ อุปจฺฉินฺทติ ฯ ปุณฺณโก อตฺตโน วจนสฺส อสุตภาวํ ญตฺวา ชิตเทวปุตฺตสฺส สนฺติกํ คนฺตฺวา อฏฺฐาสิ ฯ เวสฺสวโณ อฏฺฏํ วิจินิตฺวา ปราชิตํ อนุฏฺฐาเปตฺวา อิตรํ คจฺฉ ตว วิมาเน วสาหีติ อาห ฯ ปุณฺณโก คจฺฉ ตวนฺติ วุตฺตกฺขเณเยว มยฺหํ มาตุเลน มม เปสิตภาวํ ชานถาติ กติปเย เทวปุตฺเต สกฺขี กตฺวา เหฏฺฐา วุตฺตนเยเนว สินฺธวํ อาหราเปตฺวา ตํ อภิรุหิตฺวา ปกฺกามิ ฯ