ตมทฺทส ปพฺพตกูฏมชฺเฌติ ฯ

ตตฺถ องฺคสฺส รญฺโญติ ตทา องฺคสฺส รญฺโญ มคธรชฺชํ อโหสิ ฯ เตน วุตฺตํ ฯ ทุราสทนฺติ ปจฺจตฺถิเกหิ ทุราสทํ ฯ มสกฺกสารํ วิย วาสวสฺสาติ มสกฺกสารสํขาเต สิเนรุปพฺพเต มาปิตตฺตา มสกฺกสารนฺติ ลทฺธนามํ วาสวสฺส ภวนํ วิย ฯ ทิชาภิสํฆุฏฺฐนฺติ อญฺเญหิ ปกฺขีหิ อภิสํฆุฏฺฐํ นินฺนาทิตํ ฯ นานาสกุณาภิรุทนฺติ มธุรสฺสเรน คายนฺเตหิ วิย นานาวิเธหิ สกุเณหิ อภิรุทํ อภิคีตนฺติ อตฺโถ ฯ สุวงฺคณนฺติ สุนฺทรองฺคณํ มนุญฺญตลํ ฯ หิมวํว ปพฺพตนฺติ หิมวนฺตํ ปพฺพตํ วิย ฯ วิปุลมภิรุยฺหาติ ภิกฺขเว โส ปุณฺณโก เอวรูปํ วิปุลปพฺพตํ อภิรุยฺห ฯ ปพฺพตกูฏมชฺเฌติ ปพฺพตกูฏพฺภนฺตเร ตํ มณึ อทฺทส ฯ

ทิสฺวา มณึ ปภสฺสรํ โชติมนฺตํ

ธนารหํ มณิรตนํ อุฬารํ