เอวํ สพฺพงฺคสมฺปนฺนํ อจฺฉิมนฺตํ ปภสฺสรํ

โอธิสุงฺกํ มหาราช ปสฺส ตฺวํ ทีปทุตฺตมาติ ฯ

ตตฺถ ทเสตฺถ ราชิโยติ ตสฺมึ มณิกฺขนฺเธ ทส เสตา ราชิโย ฯ ฉ ปิงฺคลา ปณฺณรสาติ เอกวีสติ ปิงฺคลราชิโย ฯ หลิทฺทาติ หลิทฺทกวณฺณา จตุทฺทส ฯ ตึสตีติ อินฺทโคปกวณฺณาภา ตึส ราชิโย ฯ ฉ จาติ ทส จ ฉ จ โสฬส กาฬราชิโย ฯ มญฺเชฏฺฐา ปญฺจวีสตีติ ปญฺจวีสติ มญฺเชฏฺฐกวณฺณา ปสฺส ฯ มิสฺสา พนฺธกปุปฺเผหีติ วิจิตฺตกาฬ มญฺเชฏฺฐวณฺณา ราชิโย เอเตหิ ปุปฺเผหิ มิสฺสา วิจิตฺตกา ปสฺส ฯ เอตฺถ หิ กาฬราชิโย พนฺธชีวปุปฺเผหิ มิสฺสา มญฺเชฏฺฐราชิโย นีลุปฺปเลหิ วิจิตฺตกา ฯ โอธิสุงฺกนฺติ สุงฺกโกฏฺฐาสํ ฯ โย มํ ชูเตน ชินิสฺสติ ตสฺสิมํ สุงฺกโกฏฺฐาสํ ภวิสฺสตีติ วทติ ฯ อฏฺฐกถายมฺปน โหตุ สุงฺกํ มหาราชาติปิ ปาโฐ ฯ ตสฺสตฺโถ ทีปทุตฺตม ปสฺส ตฺวํ อิมํ เอวรูปํ มณึ อิทมฺเม มหาราช สุงฺกํ โหตุ โย มํ ชูเตน ชินิสฺสติ ตสฺสิทํ ภวิสฺสตีติ ฯ

มณิกณฺฑํ นิฏฺฐิตํ ฯ