อทฺธา หิ สจฺจํ ภณสิ น จ มาณว สาหสํ

ตเมว คนฺตฺวา ปุจฺฉาม เตน ตุสามุโภ ชนาติ ฯ

ตตฺถ น จ มาณว สาหสนฺติ ปสยฺห สาหสิกํ วจนํ น จ ภณสิ ฯ

เอวญฺจ ปน วตฺวา ราชา เอกสตราชาโน ปุณฺณกญฺจ คเหตฺวา ตุฏฺฐมานโส เวเคน คนฺตฺวา ธมฺมสภายํ ปาวิสิ ฯ ปณฺฑิโต อาสนา โอรุยฺห ราชานํ วนฺทิตฺวา เอกมนฺตํ อฏฺฐาสิ ฯ อถ ปุณฺณโก มหาสตฺตํ อามนฺเตตฺวา ปณฺฑิต ตฺวํ ธมฺเม ฐิโต ชีวิตเหตุปิ มุสาวาทํ น ภณสีติ กิตฺติสทฺโท เต สกลโลเก ปากโฏ อหํ ปน เต อชฺช ธมฺเม ฐิตภาวํ ชานิสฺสามีติ วตฺวา คาถมาห