อพฺยาปชฺโฌ สิยา เอวํ สจฺจวาที จ มาณโว

อสฺมา โลกา ปรํ โลกํ เอวํ เปจฺจ น โสจตีติ ฯ

ตตฺถ ตํ ตตฺถาติ ภิกฺขเว ตํ ราชานํ ตตฺถ ธมฺมสภายํ ฯ คติมาติ วรญฺญาณคติยา คติมา ฯ ธิติมาติ อพฺโภจฺฉินฺนวิริเยน ธิติสา ฯ มติมาติ ภูริสมาย วิปุลาย ปญฺญาย มติมา ฯ อตฺถทสฺสินาติ สณฺหสุขุมอตฺถทสฺสินา ญาเณน อตฺถทสฺสินา ฯ สํขาตาติ ปริจฺฉินฺทิตฺวา ชานนญาณสํขาตาย ปญฺญาย สพฺพธมฺมานํ สํขาตา วิธุรปณฺฑิโต เอตํ น สาธารณทารสฺสาติ อาทิวจนํ อพฺรวิ ฯ ตตฺถ โย ปเรสํ ทาเรสุ อปรชฺฌติ โส สาธารณทาโร นาม ตาทิโส นาสฺส น ภเวยฺย ฯ สาธุเมกโกติ สาธุรสํ ปณีตโภชนํ อญฺเญสํ อทตฺวา เอกโกว น ภุญฺเชยฺย ฯ โลกายติกนฺติ อนตฺถนิสฺสิตํ สคฺคมคฺคานํ อทายกํ อนิยฺยานิกํ วิตณฺฑสลฺลาปํ โลกายติกวาทํ น เสเวยฺย ฯ เนตํ ปญฺญาย วฑฺฒนนฺติ น หิ เอตํ โลกายติกํ ปญฺญาย วฑฺฒนํ ฯ สีลวาติ อขณฺเฑหิ ปญฺจสีเลหิ สมนฺนาคโต ฯ วตฺตสมฺปนฺโนติ ฆราวาสํ วสนฺโต ราชวตฺเตน อุปคโต ฯ อปฺปมตฺโตติ กุสลธมฺเมสุ อปฺปมตฺโต ฯ นิวาตวุตฺตีติ อติมานํ อกตฺวา นีจวุตฺติ โอวาทานุสาสนสมฺปฏิจฺฉโก ฯ อตฺถทฺโธติ ถทฺธมจฺฉริยรหิโต ฯ สุรโตติ โสรจฺเจน สมนฺนาคโต ฯ สขิโลติ เปมนียวจโน ฯ มุทูติ กายวจีจิตฺเตหิ อผรุโส ฯ สงฺคเหตา จ มิตฺตานนฺติ กลฺยาณมิตฺตานํ สงฺคหกโร ทานาทีสุเยว โย เยน สงฺคหํ คจฺฉติ ตสฺส เตเนว สงฺคาหโก โหติ ฯ สํวิภาคีติ ธมฺมิกสมณพฺราหฺมณาทีนญฺเจว กปณาทีนญฺจ สํวิภาคกโร ฯ วิธานวาติ อิมสฺมึ กาเล กสิตุํ วฏฺฏติ อิมสฺมึ กาเล วปฺปิตุํ วฏฺฏตีติ เอวํ สพฺพกิจฺเจสุ วิธานสมฺปนฺโน ฯ ตปฺเปยฺยาติ คหิตคหิตานิ ภาชนานิ ปูเรตฺวา ททมาโน ตปฺเปยฺย ฯ ธมฺมกาโมติ ปเวณีธมฺมํปิ สุจริตธมฺมํปิ กามยมาโน ปตฺถยมาโน สุตาธาโรติ สุตสฺส อาธารณภูโต ฯ ปริปุจฺฉโกติ ธมฺมิกสมณพฺราหฺมเณ อุปสงฺกมิตฺวา กึ ภนฺเต กุสลนฺติ อาทีหิ วจเนหิ ปริปุจฺฉนสีโล ฯ สกฺกจฺจนฺติ คารเวน ฯ เอวํ นุ อสฺส สงฺคโหติ สงฺคโหปิ เอวํปิ กโต นาม ภเวยฺย ฯ สจฺจวาทีติ เอวํ ปฏิปนฺโนเยว สจฺจวาที นาม สิยา ฯ

เอวํ มหาสตฺโต รญฺโญ ฆราวาสปญฺหํ กเถตฺวา ปลฺลงฺกา โอรุยฺห ราชานํ วนฺทิ ฯ ราชาปิสฺส มหาสกฺการํ กตฺวา เอกสตราชปริวุโต อตฺตโน นิเวสนเมว คโต ฯ