ตีหญฺจ ตํ วาสเยมุ อคาเร

เยนทฺธุนา อนุสาเสมุ ปุตฺตทาเรติ

ตตฺถ ตยาหมสฺมีติ ตยา ลทฺโธหมสฺมีติ อหํ ชานามิ มํ ลภนฺเตน จ นาญฺญถา ลทฺโธ ฯ ทินฺโนหมสฺมิ ตว อิสฺสเรนาติ มม อิสฺสเรน รญฺญา ตว อหํ ทินฺโน ฯ ตีหญฺจาติ มาณว อหํ ตว พหูปกาโร ราชานํ อโนโลเกตฺวา สจฺจเมว กเถสึ เตนาหํ ตยา ลทฺโธ ตฺวํ มม มหนฺตภาวํ ชานาหิ มยํ ตีณิ ทิวสานิ อตฺตโน อคาเร วเสมุ ตสฺมา ตฺวํ เยนทฺธุนา ยตฺตเกน กาเลน มยํ ปุตฺตทาเร อนุสาเสมุ ตํ กาลํ อธิวาเสหีติ ฯ

ตํ สุตฺวา ปุณฺณโก สจฺจํ ปณฺฑิโต อาห พหุปกาโร เอส มม สตฺตาหํปิ อฑฺฒมาสมฺปิ นิสีทาเปหีติ วุตฺเต อธิวาเสตพฺพเมวาติ จินฺเตตฺวา คาถมาห