โส รุกฺเข จ ปพฺพเต จ ปหริตฺวา เตสํ มชฺเฌเยว อสฺสํ เปเสสิ ฯ มหาสตฺตสฺสานุภาเวน รุกฺขาปิ ปพฺพตาปิ ตสฺส สรีรโต อุโภสุ ปสฺเสสุ รตนมตฺตํ ปฏิกฺกมนฺติ ฯ โส มโต วา โน วาติ ปริวตฺเตตฺวา มหาสตฺตสฺส มุขํ โอโลเกนฺโต กาญฺจนาทาสมิว วิปฺปสนฺนํ มุขํ ทิสฺวา อยํ เอวํ น มรตีติ ปุนปิ หิมวนฺตปฺปเทเส รุกฺเข จ ปพฺพเต จ ติกฺขตฺตุํ โปเถนฺโตปิ เตสํ มชฺเฌเยว อสฺสํ เปเสสิ ฯ ตเถว รุกฺขาปิ ปพฺพตาปิ ทูรตรํ ปฏิกฺกมนฺติเยว ฯ มหาสตฺโต ปรมกิลนฺตกาโย อโหสิ ฯ โส อิทานิ นํ วาตกฺขนฺเธ จุณฺณวิจุณฺณํ กริสฺสามีติ จินฺเตตฺวา วาตกฺขนฺเธ อสฺสํ เปเสสิ ฯ มโต วา โน วาติ ปริวตฺเตตฺวา วิกสิตปทุมํ วิย มหาสตฺตสฺส มุขํ โอโลเกสิ ฯ โส โกธาภิภูโต สตฺตมํ วาตกฺขนฺธํ ปกฺขนฺทิ ฯ โพธิสตฺตสฺสานุภาเวน วาตกฺขนฺโธ ทฺวิธา หุตฺวา โพธิสตฺตสฺส โอกาสํ อทาสิ ฯ ตโต เวรมฺภวาเตปิ ปหริ ฯ เวรมฺภวาโตปิ สตสหสฺส อสนีสทฺโท วิย ทฺวิธา หุตฺวา โพธิสตฺตสฺส โอกาสํ อทาสิ ฯ โสปิ ตสฺส อนฺตรายาภาวํ ปสฺสนฺโต ตํ อาทาย กาฬาคิริปพฺพตํ อคมาสิ ฯ เตน วุตฺตํ ฯ

สาขาสุ เสเลสุ อสชฺชมาโน

กาฬาคิรึ ขิปฺปมุปาคมาสีติ ฯ

ตตฺถ อสชฺชมาโนติ อลคฺคมาโน อปฺปฏิหญฺญมาโน วิธุรปณฺฑิตํ วหนฺโต กาฬปพฺพตมตฺถกํ อุปคโต อโหสิ ฯ