สมาคตา ชานปทา เนคมา จ สมาคตา

พาหา ปคฺคยฺห ปกฺกนฺทุํ ปณฺฑิโต โส กุหึ คโตติ ฯ

มหาสตฺตํ คเหตฺวา อากาเสน คจฺฉนฺตํ ทิสฺวา จ สุตฺวา จ เอวมฺปิ กนฺทิตฺวา เต สพฺเพปิ สกลนครวาสีหิ สทฺธึ กนฺทนฺตา ราชทฺวารํ อคมํสุ ฯ ราชา มหนฺตํ ปริเทวนสทฺทํ สุตฺวา สีหปญฺชรํ วิวริตฺวา กสฺมา ปริเทวถาติ ปุจฺฉิ ฯ อถสฺส เต เทว โส กิร มาณโว น พฺราหฺมโณ ยกฺโข พฺราหฺมณรูเปน อาคนฺตฺวา ปณฺฑิตํ อาทาย คโต เตน วินา อมฺหากํ ชีวิตํ นตฺถิ สเจ อิโต สตฺตเม ทิวเส ปณฺฑิโต นาคมิสฺสติ มยํ สกฏสเตหิ สกฏสหสฺเสหิ ทารูนิ สํกฑฺฒิตฺวา สพฺเพ อคฺคึ ปวิสิสฺสามาติ อิมมตฺถํ อาโรเจนฺตา อิมํ คาถมาหํสุ ฯ

สเจ โส สตฺตรตฺเตน ปณฺฑิโต นาคมิสฺสติ