ตตฺถ วิยตฺโตติ เวยฺยตฺติยา วิจารณปญฺญาย สมนฺนาคโต ฯ วิภาวีติ อตฺถานตฺถํ การณาการณํ วิภาเวตฺวา ทสฺเสตฺวา กเถตุํ สมตฺโถ ฯ วิจกฺขโณติ ตํ ขณํเยว ฐานุปฺปตฺติการณวิชานนปญฺญาย ยุตฺโต ฯ มา ภายิตฺถาติ มา ภายิตฺถ ขิปฺปํ อตฺตานํ โมเจตฺวา อาคมิสฺสตีติ อสฺสาเสสิ ฯ

นาคราปิ ปณฺฑิโต รญฺญา สทฺธึ กเถตฺวา คโต ภวิสฺสตีติ อสฺสาสํ ปฏิลภึสูติ ฯ

ฯ อนฺตรเปยฺยาโล นิฏฺฐิโต ฯ

ปุณฺณโกปิ มหาสตฺตํ กาฬาคิริมตฺถเก ฐเปตฺวา อิมสฺมึ ชีวมาเน มยฺหํ วุฑฺฒิ นาม นตฺถิ อิมํ มาเรตฺวา หทยมํสํ คเหตฺวา นาคภวนํ เนตฺวา วิมลาย ทตฺวา อิรนฺทตึ คเหตฺวา เทวโลกํ คมิสฺสามีติ จินฺเตสิ ฯ