หนฺตฺวานิมํ หทยํ อานยิสฺสนฺติ ฯ

ตตฺถ โสติ โส ปุณฺณโก ฯ ตตฺถ คนฺตฺวานาติ คนฺตฺวา ตตฺถ กาฬาคิริมตฺถเก ฐิโต ฯ เจตนกาติ ขเณ ขเณ อุปฺปชฺชมานา เจตฺนา อุจฺจาปิ อวจาปิ อุปฺปชฺชนฺติ ฐานํ โข ปเนตํ น วิชฺชติ ยเมตสฺส ชีวิตทานเจตนาปิ อุปฺปชฺเชยฺยาติ อิมสฺส ปน ชีเวน ตหึ นาคภวเน มม อปฺปมตฺตกมฺปิ กิญฺจิ กิจฺจํ นตฺถิ อิเธวิมํ หนฺตฺวาน อสฺส หทยํ อานยิสฺสามีติ สนฺนิฏฺฐานมกาสีติ อตฺโถ ฯ

ตโต ปุณฺณโก จินฺเตสิ ยนฺนูนาหํ อิมํ สหตฺเถน อมาเรตฺวา เภรวรูปทสฺสเนน ชีวิตกฺขยํ ปาเปยฺยนฺติ ฯ โส เภรวยกฺขรูปํ นิมฺมิตฺวา ตชฺเชนฺโต อาคนฺตฺวา ตมฺปาเตตฺวา ปาเท คเหตฺวา ทนฺตนฺตเร กตฺวา ขาทิตุกาโม วิย อโหสิ ฯ เอวํ สนฺเตปิ มหาสตฺตสฺส โลมหํสนมตฺตมฺปิ นาโหสิ ฯ ตโต สีหรูเปน จ มตฺตมหาหตฺถิรูเปน จ อาคนฺตฺวา ทาฐาหิ เจว ทนฺเตหิ จ โอวิชฺฌิตุกาโม วิย หุตฺวา ตถาปิ อภายนฺตสฺส เอกโทณิกนาวปฺปมาณํ มหนฺตํ สปฺปวณฺณํ นิมฺมิตฺวา อสฺสสนฺโต อาคนฺตฺวา สกลสรีรํ เวเฐตฺวา มตฺถเก ผณํ ธาเรสิ ฯ ตสฺส สารชฺชนมตฺตมฺปิ นาโหสิ ฯ อถ นํ ปพฺพตมตฺถเก ฐเปตฺวา ปาเตตฺวา จุณฺณวิจุณฺณํ กริสฺสามีติ มหาวาตํ สมุฏฺฐาเปสิ ฯ โส ตสฺส เกสคฺคมตฺตมฺปิ น จาเลสิ ฯ อถ นํ ตตฺเถว ปพฺพตมตฺถเก ฐเปตฺวา หตฺถี วิย ขชฺชูรีรุกฺขํ ปพฺพตํ อปราปรํ จาเลสิ ฯ ตถาปิ นํ ฐิตฏฺฐานโต เกสคฺคมตฺตมฺปิ จาเลตุํ นาสกฺขิ ฯ ตโต สทฺทสนฺตาเสนสฺส หทยผาลนํ กตฺวา มาเรสฺสามีติ อนฺโตปพฺพตํ ปวิสิตฺวา ปฐวิญฺจ นภญฺจ เอกนินฺนาทํ กโรนฺโต มหานาทํ นทิ ฯ เอวมฺปิสฺส สารชฺชนมตฺตมฺปิ นาโหสิ ฯ ชานาติ หิ มหาสตฺโต ยกฺขสีหหตฺถินาคราชเวเสน อาคโตปิ วาตวุฏฺฐิปพฺพตจลนานํ การโกปิ อนฺโตปพฺพตํ ปวิสิตฺวา นาทํ วิสชฺเชนฺโตปิ มาณโวเยว น อญฺโญติ ฯ ตโต ยกฺโข จินฺเตสิ นาหํ อิมํ พาหิรุปกฺกเมหิ มาเรตุํ สกฺโกมิ สหตฺเถเนว นํ มาเรสฺสามีติ ฯ โส มหาสตฺตํ ปพฺพตมุทฺธนิ ฐเปตฺวา ปพฺพตปาทํ คนฺตฺวา มณิกฺขนฺเธ ปณฺฑุกมฺพลสุตฺตํ ปเวเสนฺโต วิย นทนฺโต อนฺโตปพฺพเตน อุคฺคนฺตฺวา มหาสตฺตํ ทฬฺหํ คเหตฺวา ปริวตฺเตตฺวา อโธสิรํ กตฺวา อนาลมฺเพ อากาเส วิสชฺเชสิ ฯ

เตน วุตฺตํ