โส มํ ชิโต ราชา อิมสฺสทาสิ

ธมฺเมน ลทฺโธสฺมิ อสาหเสนาติ ฯ

อิมาสํ คาถานํ เหฏฺฐา วุตฺตนเยเนวตฺโถ เวทิตพฺโพ ฯ

มหาสตฺตสฺส วจนํ สุตฺวา อติเรกตรํ ตุฏฺฐา วิมาลา มหาสตฺตํ คเหตฺวา สหสฺสคนฺโธทกฆเฏหิ นหาเปตฺวา นหานกาเล มหาสตฺตสฺส ทิพฺพทุสฺสทิพฺพคนฺธมาลาทีนิ ทตฺวา อลงฺกตปฏิยตฺตกาเล ทิพฺพโภชน อทาสิ ฯ ภุตฺตโภชโน อลงฺกตาสนํ ปญฺญาเปตฺวา มหาสตฺโต อลงฺกตธมฺมาสเน นิสีทิตฺวา พุทฺธลีลาย ธมฺมํ เทเสสิ ฯ