ตา อิมสฺมึ พุทฺธุปฺปาเท

เขมา จ อุปฺปลฺลวณฺณา จ ปฏิจฺฉรา จาปิ โคตมี

ธมฺมทินฺนา มหามายา วิสาขา จาปิ สตฺติมาติ ฯ

ตาสุ ผุสฺสตี สุธมฺมา นาม หุตฺวา ทานาทีนิ ปุญฺญานิ กตฺวา วิปสฺสิสมฺมาสมฺพุทฺธสฺส กตาย จนฺทนจุณฺเณน ปูชาย ผเลน รตฺตจนฺทนปริปฺโผสิเตน วิย สรีเรน ชาตตฺตา ผุสฺสตี นาม กุมาริกา หุตฺวา เทเวสุ จ มนุสฺเสสุ จ สํสรนฺตี อปรภาเค สกฺกสฺส เทวรญฺโญ อคฺคมเหสี หุตฺวา นิพฺพตฺติ ฯ อถสฺสา ยาวตายุกํ ฐตฺวา ปญฺจสุ ปุพฺพนิมิตฺเตสุ อุปฺปนฺเนสุ สกฺโก เทวราชา ตสฺสา ปริกฺขีณายุกภาวํ ญตฺวา มหนฺเตน ยเสน ตํ อาทาย นนฺทวนุยฺยานํ คนฺตฺวา ตตฺถ ตํ อลงฺกตสิริสยนปิฏฺเฐ นิปนฺนํ สยํ สิริสยนปสฺเส นิสีทิตฺวา เอวมาห ภทฺเท ผุสฺสติ เต ทส วเร ทมฺมิ เต คณฺหาหีติ ฯ สกฺโก ตํ วรํ ททนฺโต อิมสฺมึ คาถาสหสฺสปฏิมณฺฑิเต มหาเวสฺสนฺตฺรชาทเก ปฐมํ คาถมาห