ตตฺถ อนุโมทิตฺถาติ ปมุทิตจิตฺโต โสมนสฺสปฺปตฺโต ฯ สพฺเพ เต ลจฺฉสิ วเรติ สพฺเพ เต วเร ลภสิ ฯ

เอวํ สกฺโก ทส วเร ทตฺวา ปมุทิตจิตฺโต หุตฺวา ตุฏฺฐมานโส อโหสิ ฯ

ฯ ทสวรคาถา นิฏฺฐิตา ฯ

อิติ สา วเร คเหตฺวา ตโต จุตา มทฺทรญฺโญ อคฺคมเหสิยา กุจฺฉิมฺหิ นิพฺพตฺติ ฯ ชายมานาย จนฺทนจุณฺเณน ปริปฺโผสิเตน วิย สรีเรน ชาตตฺตา เตนสฺสา นามคฺคหณทิวเส ผุสฺสตีเตฺวว นามํ กรึสุ ฯ สา มหนฺเตน ปริวาเรน วฑฺฒิตฺวา โสฬสวสฺสิกกาเล อุตฺตมรูปธรา อโหสิ ฯ อถ นํ สิวิมหาราชา ปุตฺตสฺส สญฺชยกุมารสฺสตฺถาย อาเนตฺวา ตสฺส ฉตฺตํ อุสฺสาเปตฺวา ตํ โสฬสนฺนํ อิตฺถีสหสฺสานํ เชฏฺฐกํ กตฺวา อคฺคมเหสิฏฺฐาเน ฐเปสิ ฯ