ตตฺถ โกนฺติมารายาติ โกนฺติมาราย นาม นทิยา ตีเรน ฯ คิริมารญฺชรํ ปตีติ อารญฺชรํ นาม คิรึ อภิมุโข หุตฺวา ฯ เยนาติ เยน มคฺเคน รฏฺฐา ปพฺพาชิตา ราชาโน คจฺฉนฺติ เตน มคฺเคน สุพฺพโต เวสฺสนฺตโรปิ คจฺฉตูติ เอวํ สิวิโย กเถนฺตีติ อาห ฯ อิทํ กิร โส เทวตาวิคฺคหิโต หุตฺวา กเถติ ฯ

ตํ สุตฺวา โพธิสตฺโต สาธุ โทสการกานํ ราชูนมหํ คมนมคฺเคน คมิสฺสามิ มํ โข ปน นาครา น อญฺเญน โทเสน ปพฺพาเชนฺติ มยา หตฺถิสฺส ทินฺนตฺตา ปพฺพาเชนฺติ เอวํ สนฺเตปิ อหํ เอกทิวสํ สตฺตสตกมหาทานํ ทสฺสามิ นาครา เม เอกทิวสํ ทานํ ทาตุํ โอกาสํ เทนฺตุ เสฺว ทานํ ทตฺวา ตติยทิวเส คมิสฺสามีติ วตฺวา อาห

โสหํ เตน คมิสฺสามิ เยน คจฺฉนฺติ ทูสกา

รตตินฺทิวํ เม ขมถ ยาว ทานํ ททามิหนฺติ ฯ