ตตฺถ ราชปุตฺตีติ ผุสฺสตี มทฺทราชธีตา ฯ ปปเตยฺยหนฺติ ปปเตยฺยํ อหํ ฯ รชฺชุยา พชฺฌมิยาหนฺติ รชฺชุยา คีวํ พนฺธิตฺวา มเรยฺยํ อหํ ฯ กสฺมาติ เอวํ อมตายเมว มยิ เกน การเณน มม ปุตฺตํ อทูสกํ สิวิโย ปพฺพาเชนฺติ ฯ อชฺฌายิกนฺติ ติณฺณํ เวทานํ ปารคตํ นานาสิปฺเปสุ นิปฺผตฺตึ ปตฺตํ ฯ

อิติ สา กลูนํ ปริเทวิตฺวา ปุตฺตญฺจ สุณิสญฺจ อสฺสาเสตฺวา รญฺโญ สนฺติกํ คนฺตฺวา อาห

มธูเนว ปฬิตานิ อมฺพาว ปติตา ฉมา

เอวํ เหสฺสติ เต รฏฺฐํ ปพฺพาเชนฺติ อทูสกํ