เอวํ มหาสตฺโต ปรทาริกอติจาริกานํ ปจฺจนสิมฺพลินิรยํ ทสฺเสตฺวา อิโต ปรํ สามิกวตฺตสสฺสุวตฺตาทีนิ อปูเรนฺตีนํ ปจฺจนฏฺฐานํ ปกาเสนฺโต ยา จาติ อาทิมาห ฯ ตตฺถ อติมญฺญตีติ ภึสชาตเก วุตฺตํ สามิกวตฺตํ กโรนฺตี อติกฺกมิตฺวา มญฺญติ ฯ เชฏฺฐํ วาติ สามิกสฺส เชฏฺฐภาตรํ ฯ นนนฺทนนฺติ สามิกสฺส ภคินึ ฯ เอเตสมฺปิ หิ อญฺญตรสฺส หตฺถปาทปิฏฺฐิปริกมฺมนหาปนโภชนาทิเภทํ วตฺตํ อปูเรนฺตี เตสุ หิโรตฺตปฺปํ อนุปฏฺฐเปนฺตี เต อติมญฺญติ นาม ฯ สาปิ นิรเย นิพฺพตฺตี ฯ วงฺเกนาติ ตสฺสา จ สามิกวตฺตาทีนํ อปริปูริกาย สามิกาทโย อกฺโกสิตฺวา ปริภาสิตฺวา นิรเย นิพฺพตฺตาย โลหปฐวิยํ นิปชฺชาเปตฺวา อยสงฺกุนา มุขํ วิวริตฺวา พลิเสน ชิวฺหคฺคํ นิพฺพหนฺติ รชฺชุพนฺธเนน สพนฺธนํ กฑฺฒนฺติ ฯ กิมินนฺติ กิมิภริตํ ฯ อิทํ วุตฺตํ โหติ มหาราช โส เนรยิกสตฺโต เอวํ นิกฺกฑฺฒิ ตํ อตฺตโน พฺยาเมน พฺยามมตฺตํ ชิวฺหคฺคํ อาวุเธหิ โกฏฺฏิตโกฏฺฏิตฏฺฐาเน สญฺชาเตหิ มหาโทณิปฺปมาเณหิ กิมีหิ ภริตํ ปสฺสติ ฯ วิญฺญาเปตุํ น สกฺโกตีติ นิรยปาเล ยาจิตุกาโมปิ กิญฺจิ วตฺตุํ น สกฺโกติ ฯ ตาปเนติ เอวํ สา ตตฺถ พหูนิ วสฺสสหสฺสานิ ปจฺจิตฺวา ปุน ตาปนมหานิรเย ปจฺจติ ฯ

เอวํ มหาสตฺโต สามิกวตฺตสสฺสุสสฺสุรวตฺตาทีนิ อปูเรนฺตีนํ ปจฺจนนิรยํ ทสฺเสตฺวา อิทานิ สูกริกาทีนํ ปจฺจนนิรเย ทสฺเสนฺโต โอรพฺภิกาติ อาทิมาห ฯ ตตฺต อวณฺเณ วณฺณการกาติ เปสุญฺญการกา ฯ ขารนทินฺติ เอเต โอรพฺภิกาทโย เอเตหิ สตฺติอาทีหิ หญฺญมานา เวตฺตรณึ ปปตนฺตีติ อตฺโถ ฯ เสสานิ โอรพฺภิกาทีนํ ปจฺจนฏฺฐานานิ นิมิชาตเก อาวิภวิสฺสนฺติ ฯ กูฏการีติ กูฏวินิจฺฉยสฺส เจว ตุลากูฏาทีนญฺจ การเก สนฺธาเยตํ วุตฺตํ ฯ ตตฺถ กูฏวินิจฺฉย- กูฏฏฺฏการกกูฏอคฺฆาปนิกานํ ปจฺจนนิรยานิ เนมิชาตเก อาวิภวิสฺสนฺติ ฯ วนฺตนฺติ วมิตกํ ฯ ทุรตฺตานนฺติ ทุคฺคตตฺตภาวานํ ฯ อิทํ วุตฺตํ โหติ มหาราช เต ทุรตฺตภาวา สตฺตา อยกูเฏหิ มตฺถเก ภิชฺชมาเน วมนฺติ ตโต ตํ วนฺตํ ชลิตอยกปลฺเลหิ เตสุ เอกจฺจานํ มุเข ขิปนฺติ ฯ อิติ เต ปเรสํ วนฺตํ ภุญฺชนฺติ นาม ฯ เภรณฺฑกาติ สิงฺคาลา ฯ วิปฺผนฺทมานนฺติ อโธมุขนิปชฺชาปิตนิกฺกฑฺฒิตชิวฺหํ อิโตจีโตจ วิปฺผนฺทมานํ ฯ มิเคนาติ โอกจาริกมิเคน ฯ ปกฺขินาติ ตถารูเปเนว ฯ คนฺตฺวา เตติ เต คนฺตฺวา ฯ นิรยุสฺสทนฺติ อุสฺสทนิรยํ ฯ ปาลิยํ ปน นิรยํ อโธติ ลิขิตํ ฯ อยํ ปน นิรโย เนมิชาตเก อาวิภวิสฺสตีติ ฯ