ตมหํ อนุพนฺธิสฺสํ สพฺพกามทโท หิ เมติ ฯ

ตตฺถ ตมพฺรวีติ ภิกฺขเว มทฺที รญฺโญ วจนํ สุตฺวา ตํ ราชานํ อพฺรวิ ฯ อภิสมฺโภสฺสนฺติ สหิสฺสามิ อภิวาเสสฺสามิ ฯ โปตกิลนฺติ โปตกิลติณํ ฯ ปนูทเหสฺสามีติ เทฺวธา กตฺวา เวสฺสนฺตรสฺส ปุรโต คมิสฺสามิ ฯ อุทรสฺสุปโรเธนาติ อุปวาเสน ขุทาธิวาเสน ฯ โคหนุเวฏฺฐเนนาติ วิสาลกฏิโย โอนตปสฺสา จ สามิกํ ลภนฺตีติ ญตฺวา โคหนุนา กฏิผลกํ โกฏาเปตฺวา เวฏฺฐเนน ปสฺสานิ โอนาเมตฺวา กุมาริกา ปตึ ลภนฺติ ฯ กฏุกนฺติ อสาตํ ฯ คจฺฉญฺเญวาติ คมิสฺสามิเยว ฯ อปฺปตฺโตติ อสฺสา วิธวาย อุจฺฉิฏฺฐกํ ปริภุญฺชิตุํ อนนุจฺฉวิโกเยว ฯ โย นนฺติ โย นีจชจฺโจ ตํ วิธวํ อนิจฺฉมานญฺเญว หตฺเถ คเหตฺวา กฑฺฒติ ฯ เกสคฺคหณมุกฺเขปา ภูมฺยา จ ปริสุมฺภนาติ อสฺสามิกํ อิตฺถึ หตฺถปาเทหิ เกสคฺคหณํ อุกฺเขปา ภูมิยํ ปาเตนฺติ เอตา อวมญฺญา นาติกฺกมนฺติ ฯ ทตฺวา จาติ อสฺสามิกาย อิตฺถิยา เอวรูปํ พหุํ อนปฺปกํ ทุกฺขํ ปโร ปุริโส ทตฺวา จ ฯ โน ปกฺกมตีติ ตํ นิราสํโก โอโลเกนฺโตว ติฏฺฐติ ฯ สุกฺกจฺฉวีติ นหานิยจุณฺเณหิ อุพฺภตฺติตฉวิวณฺณา ฯ เวธเวราติ วิธวตฺถิกา ฯ ทตฺวาติ กิญฺจิเทว อปฺปมตฺตกํ ธนํ ทตฺวา ฯ สุภคฺคมานิโนติ มยํ สุภคฺคาติ มญฺญมานา ฯ อกามนฺติ ตํ วิธวํ อสฺสามิกํ อกามํ ฯ อุลูกญฺเญว วายสาติ กากา วิย อุลูกํ ปริกฑฺฒนฺติ ฯ กํสปฺปชฺโชตเนติ สุวณฺณภาชเนหิ ปชฺโชตนฺเต ฯ วสนฺติ เอวรูเปปิ ญาติกุเล วสมานา ฯ เนวาติวากฺยํ น ลเภติ อยํ อิตฺถี นิสฺสามิกา ยาวชีวํ อมฺหากญฺเญว ภารา ชาตาติ อาทีนิ วจนานิ วทนฺเตหิ ภาตูหิปิ สขิเกหิปิ อติวากฺยํ ครหวจนํ เอตํ วจนํ เนว น ลเภ ลภติเยว ฯ ปญฺญาณนฺติ ปากฏภาวกรณํ ฯ ยา ทลิทฺที ทลิทฺทสฺสาติ เทว กิตฺติสมฺปนฺนา ยา อิตฺถี อตฺตโน สามิกสฺส ทลิทฺทสฺส ทุกฺขปฺปตฺตสฺส กาเล สยํปิ ทลิทฺที สมานา ทุกฺขา จ โหติ ฯ ตสฺส สามิกสฺส อฑฺฒสฺส สุขปฺปตฺตสฺส กาเล เตเนว สทฺธึ อฑฺฒา สุขปฺปตฺตา โหติ ฯ ตํ เว เทวา ปสํสนฺตีติ เทวาปิ ตํ เอวรูปํ อิตฺถึ ปสํสนฺติ ฯ อภิชฺชนฺตฺยาติ อเภชฺชนฺติยา สเจปิ หิ อิตฺถิยา สกลปฐวี น ภิชฺชติ สกลาย ปฐวิยา สา จ อิสฺสรา โหติ ตถาปิ เวธพฺยํ กฏุกเมวาติ อตฺโถ ฯ สุขรา วต อิตฺถิโยติ สุฏฺฐุ ขรา วต อิตฺถิโยติ ฯ

ตมพฺรวี มหาราชา มทฺทึ สพฺพงฺคโสภนํ