ตตฺถ นิสาเมหีติ โอโลเกหิ ฯ

อถ มหาสตฺโต สหชาเต สฏฺฐีสหสฺเส อมจฺเจ จ เสสชนญฺจ นิวตฺตาเปตฺวา รถํ ปาเชนฺโต มทฺทึ อาห ภทฺเท สเจ ปจฺฉโต ยาจกา อาคจฺฉนฺติ อุปธาเรยฺยาสีติ ฯ สาปิ โอโลเกนฺตี นิสีทิ ฯ อถสฺส สตฺตสตกมหาทานํ สมฺปาปุณิตุํ อสกฺโกนฺตา จตฺตาโร พฺราหฺมณา นครํ คนฺตฺวา กุหึ ราชาติ ปุจฺฉิตฺวา ทานํ ทตฺวา คโตติ วุตฺเต กึ คเหตฺวา คโตติ ปุจฺฉิตฺวา รเถน คโตติ สุตฺวา อสฺเส นํ ยาจิสฺสามาติ อนุพนฺธึสุ ฯ อถ มทฺที เต อาคจฺฉนฺเต ทิสฺวา ยาจกา อาคจฺฉนฺติ เทวาติ อาโรเจสิ ฯ มหาสตฺโต รถํ ฐเปสิ ฯ เต อาคนฺตฺวา อสฺเส ยาจึสุ ฯ มหาสตฺโต จตุโร อสฺเส เตสํ อทาสิ ฯ

ตมตฺถํ ปกาเสนฺโต สตฺถา อาห

ตํ พฺราหฺมณา อนฺวคมุํ เต ตํ อสฺเส อยาจิสุํ