อนสฺสโก อรถโก ทีฆมทฺธานมาคโต

กจฺจามิตฺเตหิ ปกโต อนุปฺปตฺโตสิมํ ทิสนฺติ ฯ

ตตฺถ ทิสฺวาติ ทูรโตว ปสฺสิตฺวา ฯ เจตปาโมกฺขาติ เจตราชาโน ฯ อุปาคมุนฺติ อุปสงฺกมึสุ ฯ กุสลนฺติ อาโรคฺยํ ฯ อนามยนฺติ นิทฺทุกฺขภาวํ ฯ โก เต พลนฺติ กุหึ นุ ตว พลนิกาโย ฯ รถมณฺฑลนฺติ เยนาสิ อลงฺกตรเถน อาคโต โส กุหินฺติ ปุจฺฉนฺติ ฯ อนสฺสโกติ อนสฺสโกเยว ฯ อรถโกติ อยานโก ฯ ทีฆมทฺธานมาคโตติ ทีฆมคฺคํ อาคโตสิ ฯ ปกโตติ อภิภูโต อุปทฺทุโต ฯ

อถ เนสํ สฏฺฐีสหสฺสานํ ราชูนํ มหาสตฺโต อตฺตโน อาคตการณํ กเถนฺโต อาห