ตสฺมึ ขเณ สกฺกสฺส ภวนํ อุณฺหาการํ ทสฺเสสิ ฯ สกฺโก อาวชฺเชนฺโต ตํ การณํ ญตฺวา มหาสตฺโต หิมวนฺตํ ปวิฏฺโฐ ตสฺส วสนฏฺฐานํ ลทฺธุํ วฏฺฏตีติ จินฺเตตฺวา วิสฺสุกมฺมํ อามนฺเตตฺวา คจฺฉ ตาต ตฺวํ วงฺกตปพฺพตกุจฺฉิมฺหิ รมฺมณีเย ฐาเน อสฺสมปทํ มาเปตฺวา เอหีติ วิสฺสุกมฺมํ เปเสสิ ฯ โส สาธูติ สมฺปฏิจฺฉิตฺวา เทวโลกโต โอตริตฺวา ตตฺถ คนฺตฺวา เทฺว ปณฺณสาลาโย ทฺวิจงฺกเม รตฺติฏฺฐานทิวาฏฺฐานานิ จ มาเปตฺวา จงฺกมโกฏิยํ เตสุ เตสุ ฐาเนสุ นานาปุปฺผวิจิตฺเต ปุปฺผคจฺเฉ จ กทลีวนานิ จ ทสฺเสตฺวา สพฺเพ ปพฺพชิตปริกฺขาเร ปฏิยาเทตฺวา เย เกจิ ปพฺพชิตุกามา เต อิเม คณฺหนฺตูติ อกฺขรานิ ลิขิตฺวา อมนุสฺเส จ เภรวสทฺเท มิคปกฺขิโน จ ปฏิกฺกมาเปตฺวา สกฏฺฐานเมว คโต ฯ มหาสตฺโตปิ เอกปทิกมคฺคํ ทิสฺวา ปพฺพชิตานํ วสนฏฺฐานํ ภวิสฺสตีติ สลฺลกฺเขตฺวา มทฺทิญฺจ ปุตฺเต จ อสฺสมปททฺวาเร ฐเปตฺวา สยํ อสฺสมปทํ ปวิสิตฺวา อกฺขรานิ โอโลเกตฺวา สกฺเกน ทิฏฺโฐสฺมีติ สกฺกทตฺติยภาวํ ญตฺวา ปณฺณสาลทฺวารํ วิวริตฺวา ปวิสิตฺวา ขคฺคญฺจ ธนุญฺจ อปเนตฺวา สาฏเก โอมุญฺจิตฺวา รตฺตวากจีรํ นิวาเสตฺวา อชินจมฺมํ องฺเส กตฺวา ชฏามณฺฑลํ พนฺธิตฺวา อิสิเวสํ คเหตฺวา กตฺตรทณฺฑํ อาทาย ปณฺณสาลาโต นิกฺขมิตฺวา ปพฺพชิตสิรึ สมุฏฺฐหนฺโต อโห สุขํ ปรมํ สุขํ ปพฺพชฺชา เม อธิคตาติ อุทานํ อุทาเนตฺวา จงฺกมํ อารุยฺห อปราปรํ จงฺกมิตฺวา ปจฺเจกพุทฺธสทิเสน อุปสเมน ปุตฺตทารานํ สนฺติกํ อคมาสิ ฯ มทฺที เทวีปิ โอโลเกนฺตี สญฺชานิตฺวา มหาสตฺตสฺส ปาเทสุ นิปติตฺวา วนฺทิตฺวา โรทิตฺวา เตเนว สทฺธึ อสฺสมปทํ ปวิสิตฺวา อตฺตโน ปณฺณสาลํ คนฺตฺวา รตฺตวากจีรํ นิวาเสตฺวา อชินจมฺมํ อํเส กตฺวา ชฏามณฺฑลํ พนฺธิตฺวา อิสินีเวสํ คณฺหิ ฯ เต ปจฺฉา ปุตฺเตปิ ตาปสกุมาเร กรึสุ ฯ จตฺตาโรปิ ขตฺติยา วงฺกตปพฺพตกุจฺฉิยํ วสึสุ ฯ อถ มทฺที มหาสตฺตํ วรํ ยาจิ เทว ตุมฺเห ผลาผลตฺถาย อรญฺญํ อคนฺตฺวา ปุตฺเต คเหตฺวา อิเธว โหถ อหํ ผลาผลํ อาหริสฺสามีติ ฯ ตโต ปฏฺฐาย สา อรญฺญโต ผลาผลานิ อาหริตฺวา ตโย ชเน ปฏิชคฺคติ ฯ โพธิสตฺโตปิ ตํ วรํ ยาจิ ภทฺเท มทฺทิ มยํ อิโต ปฏฺฐาย อกาเล มม สนฺติกํ มา อาคจฺฉาหีติ ฯ สา สาธูติ สมฺปฏิจฺฉิ ฯ มหาสตฺตสฺส เมตฺตานุภาเวน สมนฺตา ติโยชเน ฐาเน สพฺเพ ติรจฺฉานาปิ อญฺญมญฺญํ เมตฺตจิตฺตํ ปฏิลภึสุ ฯ มทฺที เทวี ปาโต วุฏฺฐาย ปานียํ ปริโภชนียํ อุปฏฺฐเปตฺวา มุโขทกํ อาหริตฺวา ทนฺตกฏฺฐํ ทตฺวา อสฺสมปทํ สมฺมชฺชิตฺวา เทฺว ปุตฺเต ปิตุ สนฺติเก ฐเปตฺวา ปจฺฉิขนิตฺตีองฺกุสหตฺถา อรญฺญํ ปวิสิตฺวา วนมูลผลาผลานิ อาทาย ปจฺฉึ ปูเรตฺวา สายณฺหสมเย อรญฺญโต อาคนฺตฺวา ปณฺณสาลายํ ผลาผลานิ ฐเปตฺวา นหาตฺวา ปุตฺเต นหาเปสิ ฯ อถ จตฺตาโรปิ ขตฺติยา ปณฺณสาลทฺวาเร นิสีทิตฺวา ผลาผลํ ปริภุญฺชนฺติ ฯ ตโต มทฺที เทฺว ปุตฺเต คเหตฺวา อตฺตโน ปณฺณสาลํ คจฺฉติ ฯ อิมินาว นิยาเมน เต จตฺตาโร ขตฺติยา วงฺกตปพฺพตกุจฺฉิมฺหิ สตฺตมาเส วสึสูติ ฯ