วนปฺปเวสกณฺฑํ นิฏฺฐิตํ

ตทา กาลิงฺครฏฺเฐ ทุนฺนวิฏฺฐพฺราหฺมณคามวาสี ชูชโก นาม พฺราหฺมโณ ภิกฺขาจริยาย กหาปณสตํ ลภิตฺวา เอกสฺมึ พฺราหฺมณกุเล ฐเปตฺวา ปุน ธนํ ปริเยสนตฺถาย คโต ฯ ตสฺมึ จิรายนฺเต พฺราหฺมณกุลํ กหาปเณ วลญฺเชตฺวา ปจฺฉา อิตเรน อาคนฺตฺวา โจทิยมานํ กหาปเณ ทาตุํ อสกฺโกนฺตํ อมิตฺตตาปนํ นาม ธีตรํ ตสฺส อทาสิ ฯ โส ตํ อาทาย กาลิงฺครฏฺเฐ ทุนฺนวิฏฺฐพฺราหฺมณคามํ คนฺตฺวา วสิ ฯ อมิตฺตตาปนา สมฺมา พฺราหฺมณํ ปฏิชคฺคิ ฯ อถ อญฺเญ ตรุณพฺราหฺมณา ตสฺสา อาจารสมฺปตฺตึ ทิสฺวา อยํ อมิตฺตตาปนา มหลฺลกพฺราหฺมณํ สมฺมา ปฏิชคฺคิ ตุมฺเห อมฺเหสุ กึ ปมชฺชถาติ อตฺตโน ภริยาโย ตชฺเชนฺติ ฯ ตา อิมํ อมิตฺตตาปนํ อิมมฺหา คามา ปลาเปสฺสามาติ นทีติตฺถาทีสุ สนฺนิปติตฺวา ตํ ปริภาสึสุ ฯ

ตมตฺถํ ปกาเสนฺโต สตฺถา อาห

อหุ วาสี กลิงฺเคสุ ชูชโก นาม พฺราหฺมโณ