ตาย โส เอกวาจาย ปสเว ปุญฺญํ อนปฺปกนฺติ ฯ

ตตฺถ ชยนฺตนฺติ มจฺเฉรวิชิตํ ฯ โก เม เวสฺสนฺตรํ วิทูติ โก มยฺหํ เวสฺสนฺตรํ อาจิกฺเขยฺยาติ วทติ ฯ ปติฏฺฐาสีติ ปติฏฺฐา อาสิ ฯ สนฺตานนฺติ ปริยนฺตานํ ฯ กิลนฺตานนฺติ มคฺคกิลนฺตานํ ฯ ปฏิคฺคหนฺติ ปฏิคฺคาหกํ ปติฏฺฐาภูตํ ฯ อหํ ชานนฺติ โย วชฺชาติ อหํ เวสฺสนฺตรสฺส วสนฏฺฐานํ ชานามีติ โย เอวํ วเทยฺยาติ อตฺโถ ฯ

ตสฺส ตํ ปริเทวนสทฺทํ อารกฺขณตฺถาย ฐปิโต เจตปุตฺโต มิคลุททโก หุตฺวา อรญฺเญ วิจรนฺโต สุตฺวา อยํ พฺราหฺมโณ เวสฺสนฺตรสฺสตฺถาย ปริเทวติ น โข ปเนส ธมฺมตาย อาคโต มทฺทึ วา ทารเก วา ยาจิสฺสติ อิเธว นํ มาเรสฺสามีติ ตสฺสํ สนฺติกํ คนฺตฺวา พฺราหฺมณ น เต ชีวิตํ ทสฺสามีติ ธนุํ อาโรเปตฺวา อากฑฺฒิตฺวา ตชฺเชสิ ฯ

ตมตฺถํ ปกาเสนฺโต สตฺถา อาห