มหาวนวณฺณนา นิฏฺฐิตา ฯ

ชูชโกปิ อจฺจุตตาปเสน กถิตมคฺเคน ยาว จตุรสฺสโปกฺขรณีตีรํ ปตฺวา จินฺเตสิ อชฺชติกสายณฺเห อิทานิ มทฺที อรญฺญโต อาคมิสฺสติ มาตุคาโม หิ นาม ทานสฺส อนฺตรายกโร โหติ เสฺว ตสฺสา อรญฺญคตกาเล อสฺสมปทํ คนฺตฺวา เวสฺสนฺตรํ อุปสํกมิตฺวา ทารเก ยาจิตฺวา ตาย อนาคตาย เอวนฺเต คเหตฺวา ปกฺกมิสฺสามีติ ฯ อถสฺสาวิทูเร เอกํ สานุปพฺพตํ อารุยฺห ผาสุกฏฺฐาเน นิปชฺชิ ฯ

ตํ ปน รตฺตึ ปจฺจุสกาเล มทฺที สุปินํ อทฺทส เอวรูโป สุปิโน ทิฏฺโฐ อโหสิ เอโก ปุริโส กณฺโห เทฺว กาสายานิ ปริทหิตฺวา ทฺวีสุ กณฺเณสุ รตฺตมาลํ ปิลนฺทิตฺวา อาวุธหตฺโถ ตชฺเชนฺโต อาคนฺตฺวา ปณฺณสาลํ ปวิสิตฺวา มทฺทึ ชฏาสุ คเหตฺวา อากฑฺฒิตฺวา ภูมิยํ อุตฺตานํ ปาเตตฺวา วิรวนฺติยา ตสฺสา เทวิยา เทฺว อกฺขีนิ อุปฺปาเฏตฺวา เทฺว พาหานิ ฉินฺทิตฺวา อุรํ ภินฺทิตฺวา ปคฺฆรนฺตโลหิตพินฺทุํ หทยมํสํ อาทาย ปกฺกามีติ ฯ สา มทฺที ปพุชฺฌิตฺวา ภีตตสิตา ปาปโก เม สุปิโน ทิฏฺโฐติ สุปินปาฐโก ปน เวสฺสนฺตเรน สทิโส นาม นตฺถิ ปุจฺฉามิ นนฺติ จินฺเตตฺวา คนฺตฺวา มหาสตฺตสฺส ปณฺณสาลทฺวารํ อาโกเฏสิ ฯ

อถ มหาสตฺโต ตํ สทฺทํ สุตฺวา โก เอโสติ อาห ฯ อหํ เทว มทฺทีติ ฯ ภทฺเท อมฺหากํ กติกวตฺตํ ภินฺทิตฺวา กสฺมา อกาเล อาคตาสีติ ฯ เทว อหํ น กิเลสวเสน อาคจฺฉามิ อปิจ โข ปน เม ปาปโก สุปิโน ทิฏฺโฐติ อาห ฯ เตนาหิ กเถหิ มทฺทีติ ฯ สา อตฺตนา ทิฏฺฐนิยาเมเนว กเถสิ ฯ มหาสตฺโต ตํ สุปินํ ปริคฺคณฺหิตฺวา มยฺหํ ทานปารมิโย ปูเรสฺสนฺติ เสฺว มํ ยาจโก อาคนฺตฺวา ปุตฺเต ยาจิสฺสติ มทฺทึ อสฺสาเสตฺวา อุยฺโยเชสฺสามีติ จินฺเตตฺวา มทฺทิ ตว ทุสฺสยนทุพฺโภชเนหิ จิตฺตํ อาลุลิตํ ภวิสฺสติ มา ภายีติ ปโมเหตฺวา อสฺสาเสตฺวา อุยฺโยเชสิ ฯ สา วิภาตาย รตฺติยา สพฺพํ กตฺตพฺพกมฺมํ กตฺวา เทฺว ปุตฺเต อาลิงฺคิตฺวา สีเส จุมฺทิตฺวา อชฺช เม ทุสฺสุปิโน ทิฏฺโฐ อมฺมตาตา อปฺปมตฺตา ภเวยฺยาถาติ โอวทิตฺวา มหาสตฺตสฺส สนฺติกํ คนฺตฺวา เทว ทารเกสุ อปฺปมตฺตา โหถาติ มหาสตฺตํ ปุตฺเต ปฏิจฺฉาเปตฺวา ปจฺฉิขณิตฺติอาทีนิ อาทาย อสฺสูนิ มุญฺจนฺตี มูลผลาผลตฺถาย วนํ ปาวิสิ ฯ