ชูชโกปิ อิทานิ มทฺที อรญฺญํ คตา ภวิสฺสตีติ สานุปพฺพตา โอรุยฺห เอกปทิกมคฺเคน อสฺสมาภิมุโข ปายาสิ ฯ อถ มหาสตฺโต ปณฺณสาลโต นิกฺขมิตฺวา ปาสาณผลเก สุวณฺณปติมา วิย นิสีทิตฺวา จินฺเตสิ อิทานิ ยาจโก อาคมิสฺสตีติ ปิปาสิโต วิย สุราโสณฺโฑ ตสฺสาคมนมคฺคํ โอโลเกนฺโต นิสีทิ ฯ ปุตฺตาปิสฺส ปาทมูเล กีฬนฺติ ฯ โส มคฺคํ โอโลเกนฺโต พฺราหฺมณํ อาคจฺฉนฺตํ ทิสฺวา สตฺตมาเส นิกฺขิตฺตํ ทานธุรํ อุกฺขิเปนฺโต วิย เอหิ วต โภ พฺราหฺมณาติ โสมนสฺสปฺปตฺโต ชาลิกุมารํ อามนฺเตนฺโต อิมํ คาถมาห

อุฏฺเฐหิ ชาลิ ปติฏฺฐ โปราณํ วิย ทิสฺสติ

พฺราหฺมณํ วิย ปสฺสามิ นนฺทิโย มาภิกีรเรติ ฯ

ตตฺถ โปราณํ วิย ทิสฺสตีติ ปุพฺเพ เชตุตฺตรนคเร นานาทิสาหิ ยาจกานํ อาคมนํ วิย อชฺช ยาจกานํ อาคมนํ ทิสฺสติ ฯ นนฺทิโย มาภิกีรเรติ เอตสฺส พฺราหฺณสฺส ทิฏฺฐกาลโต ปฏฺฐาย มํ โสมนสฺสานิ อภิกีรนฺติ ฆมฺมาภิตตฺตสฺส สีเส สีตูทกฆฏสหสฺสาภิเสจนกาโล วิย ชาโต ฯ