ตํ สุตฺวา กุมาโร อรห

อหํปิ ตาต ปสฺสามิ โย โส พฺรหฺมาว ทิสฺสติ

อตฺถิโก วิย อายาติ อติถี โน ภวิสฺสตีติ ฯ

วตฺวา จ ปน ชาลิกุมาโร มหาสตฺตสฺส อปจิตึ กโรนฺโต อุฏฺฐาย พฺราหฺมณํ ปจฺจุคฺคนฺตฺวา ปริกฺขารคหณํ อาปุจฺฉิ ฯ พฺราหฺมโณ ตํ โอโลเกตฺวา อยํ เวสฺสนฺตรสฺส ปุตฺโต ชาลิกุมาโร นาม ภวิสฺสติ อาทิโต ปฏฺฐาเยวสฺส ผรุสวจนํ กเถสฺสามีติ จินฺเตตฺวา อเปหิ อเปหีติ อจฺฉรํ ปหริ ฯ กุมาโร อปคนฺตฺวา อยํ พฺราหฺมโณ อติผรุโส กินฺนุโขติ ตสฺส สรีรํ โอโลเกนฺโต อฏฺฐารส ปุริสโทเส ปสฺสิ ฯ พฺราหฺมโณปิ โพธิสตฺตํ อุปสงฺกมิตฺวา ปฏิสนฺถารํ กโรนฺโต อาห