ตโต อุปฑฺฒํ ทสฺสามิ มคฺคํ เม เทถ ยาจิตา

ราชปุตฺตี จ โน มาตา ราชปุตฺโต จ โน ปิตา

ธมฺเมน ภาตโร โหถ มคฺคํ เม เทถ ยาจิตาติ ฯ

ตตฺถ ตสฺสาติ ตสฺสา มม ฯ อสฺสมาคมนํ ปตีติ อสฺสมํ ปฏิจฺจ สนฺธาย อาคจฺฉนฺติยา ฯ อุปฏฺฐหุนฺติ อุปฏฺฐาย ฐิตา ฯ เต กิร ปฐมํ ปฏิปาฏิยา นิปชฺชิตฺวา ตาย อาคมนกาเล อุฏฺฐาย วิชิมฺหิตฺวา มคฺคํ รุมฺภนฺตา ปฏิปาฏิยา ติริยํ อฏฺฐํสุ ฯ ยญฺจ เนสนฺติ อหญฺจ ยํ อิโต มูลผลาผลํ เตสํ หริสฺสํ ตํ เวสฺสนฺตโร จ อุโภ ปุตฺตกา ปสฺสาติ เต ตโยปิ ชนา ภุญฺเชยฺยุํ อญฺญํ เนสํ โภชนํ นตฺถิ ฯ อนายตินฺติ อนาคจฺฉนฺตึ มํ ญตฺวา เอกโกว นูน ทารเก โตเสนฺโต นิสินฺโน ฯ สํเวสนากาเลติ อญฺเญสุ ทิวเสสุ อตฺตโน ขาทาปนปิปายนกาเล ฯ ขีรํ ปีตาวาติ ยถา ขีรปีตา มิคโปตกา ขีรสฺสตฺถาย กนฺทิตฺวา ตํ อลภิตฺวา กนฺทนฺตาว นิทฺทํ โอกฺกมนฺติ เอวํ เต ผลาผลตฺถาย กนฺทิตฺวา ตํ อลภิตฺวา กนฺทนฺตาว นิทฺทํ อุปคตา ภวิสฺสนฺตีติ วทติ ฯ วารึ ปีตาวาติ อสฺสมปเท ยถา มิคโปตกา ปิปาสิกา ปานียตฺถาย กนฺทิตฺวา ตํ อลภิตฺวา กนฺทนฺตาว นิทฺทํ โอกฺกมนฺตีติ อิมินา นเยน อตฺโถ ทฏฺฐพฺโพ ฯ อจฺฉเรติ อจฺฉนฺติ ฯ ปจฺจุคฺคตา มํ ติฏฺฐนฺตีติ มํ ปจฺจุคฺคตา หุตฺวา ติฏฺฐนฺติ ฯ ปจฺจุคฺคตุนฺติปิ ปาโฐ ฯ ปจฺจุคฺคนฺตฺวาติ อตฺโถ ฯ เอกายโนติ เอกสฺเสว อายโน เอกปทิกมคฺโค ฯ เอกปโถติ โส จ เอโกว ทุติโย นตฺถิ โอกฺกมิตฺวาปิ คนฺตุํ น สกฺกา ฯ กสฺมา ฯ ยสฺมา สรา โสพฺภา จ ปสฺสโต ฯ นมตฺถูติ สา อญฺญํ มคฺคํ อทิสฺวา เอเต ยาจิตฺวา ปฏิกฺกมาเปสฺสามีติ ผลปจฺฉึ อํสโต โอตาเรตฺวา อญฺชลึ ปคฺคยฺห นมสฺมานา เอวมาห ฯ ภาตโรติ มยํ หิ มนุสฺสราชปุตฺตา ตุมฺเหปิ มิคราชปุตฺตา อิติ เม ธมฺเมน ภาตโร โหถ ฯ อวรุทฺธสฺสาติ รฏฺฐโต ปพฺพาชิตสฺส ฯ รามํ สีตาวนุพฺพตาติ ยถา ทสรถมหาราชปุตฺตํ รามํ ตสฺส กนิฏฺฐา สีตา เทวี ตสฺเสว อคฺคมเหสี หุตฺวา ตํ อนุพฺพตา ปติเทวตา หุตฺวา อปฺปมตฺตา อุปฏฺฐาติ ตถา อหํปิ เวสฺสนฺตรํ อปฺปมตฺตา อุปฏฺฐาสินฺติ วทติ ฯ ตุมฺเห จาติ ตุมฺเห จ มยฺหํ มคฺคํ ทตฺวา สายํ โคจรคฺคหณกาเล ปุตฺเต ปสฺสถ อหญฺจ อตฺตโน ปุตฺเต ปสฺเสยฺยํ เทถ มคฺคนฺติ ยาจติ ฯ