สกุณานญฺจ โอปาโต เกน นีตา เม ทารกาติ ฯ

ตตฺถ อปิ รตฺเตว เม มโนติ อปิจ พลวปจฺจูเส สุปินํ ปสฺสนฺติยา วิย เม มโน ฯ มิคาติ สีหาทโย พาฬมิคา ฯ อีริเนติ นิโรเช ฯ วิวเนติ วิวิเต ฯ อาทู เตติ อาทู เชตุตฺตรนคเร สิวิรญฺโญ สนฺติกํ ตยา ทูตา กตฺวา เปสิตา ฯ อาทู สุตฺตาติ อนฺโต ปณฺณสาลํ ปวิสิตฺวา สยิตา ฯ อาทู พหิ โนติ อาทู โน เต ทารกา ขิทฺทาปสุตา หุตฺวา พหิ นิกฺขนฺตาติ ปุจฺฉติ ฯ เนวาสํ เกสา ทิสฺสนฺตีติ สามิ เวสฺสนฺตร เนว เตสํ กาฬญฺชนวณฺณา เกสา ทิสฺสนฺติ ชาลวิจิตฺตา หตฺถปาทา ทิสฺสนฺติ ฯ สกุณานญฺจ โอปาโตติ หิมวนฺตปฺปเทเส หตฺถิลิงฺคสกุณา นาม อตฺถิ เตปิ อุปติตฺวา อาทาย อากาเสเนว คจฺฉนฺติ เตน ตํ ปุจฺฉามิ กินฺเตหิ สกุเณหิ นีตา อิโต อญฺเญสํปิ เกสญฺจิ เตสํ สกุณานํ วิย โอปาโต ชาโต อกฺขาหิ เกน นีตา เม ทารกาติ ฯ

เอวํ วุตฺเตปิ มหาสตฺโต น กิญฺจิ กเถสิ ฯ อถ นํ สา เทว กสฺมา มยา สทฺธึ น กเถสิ โก มม โทโสติ วตฺวา อาห

อิทํ ตโต ทุกฺขตรํ สลฺลวิทฺโธ ยถา วโณ