มญฺเญ โอกฺกนฺตสนฺตมํ ปาโต ทกฺขสิ โน มตนฺติ ฯ

ตตฺถ อิทํ ตโต ทุกฺขตรนฺติ สามิ เวสฺสนฺตร ยํ มม รฏฺฐา ปพฺพชิตาย อรญฺเญ วสนฺติยา ปุตฺเต จ อปสฺสนฺติยา ทุกฺขํ อิทํ ตว มยา สทฺธึ อกถนํ มยฺหํ ตโต ทุกฺขตรํ ตฺวํ หิ มํ อคฺคิทฑฺฒํ ปฏิทหนฺโต วิย ตาลา ปติตํ ทณฺเฑน โปเถนฺโต วิย สลฺเลน วเณ ปฏิวิชฺฌนฺโต วิย ตุณฺหีภาเวน กิลเมสิ ฯ อิทํ หิ เม หทยํ สลฺลวิทฺโธ ยถา วโณ ตเถว กมฺปติ เจว รุชติ จ ฯ สํวิทฺโธติปิ ปาโฐ ฯ สมฺปฏิวิทฺโธติ อตฺโถ ฯ โอกฺกนฺตสนฺตมนฺติ อปคตชีวิตํ มํ ฯ ทกฺขสิ โนติ เอตฺถ โนกาโร นิปาตมตฺโต ฯ กาลสฺเสว มตํ มํ ปสฺสสีติ อตฺโถ ฯ

อถ มหาสตฺโต กกฺขลกถาย นํ ปุตฺตโสกํ ชหาเปสฺสามีติ จินฺเตตฺวา อิมํ คาถมาห

นนุ มทฺที วราโรหา ราชปุตฺตี ยสสฺสินี