น โข โน เทว ปสฺสามิ เยน เต นีหฏา มตา

สกุณาปิ น วสฺสนฺติ มตา เม นูน ทารกาติ ฯ

ตตฺถ น โข โนติ เทว น โข อมฺหากํ ปุตฺเต ปสฺสามิ ฯ เยน เต นีหฏา มตาติ เกนจิ เตสํ นีหฏภาวํปิ น ชานามีติ อธิปฺปาเยเนว อาห ฯ

ตาย เอวํ วุตฺเตปิ มหาสตฺโต น กิญฺจิ กเถสิ ฯ สา ปุตฺตโสเกน ผุฏฺฐา ปุตฺเต อุปธาเรนฺตี ตติยวารํ ตานิ ตานิ ฐานานิ วาตเวเคน วิจริ ฯ ตาย กิร เอกรตฺตึ วิจริตฏฺฐานํ อุปริคยฺหมานํ ปณฺณรสโยชนมคฺคํ อโหสิ ฯ อถ รตฺติ วิภายิ ฯ อรุโณทโย ชาโต ฯ สา ปุนาคนฺตฺวา มหาสตฺตสฺส สนฺติเก ฐิตา ปริเทวิ ฯ