วิจรนฺตี รุกฺขมูเลสุ ปพฺพเตสุ คุหาสุ จ

อิติ มทฺที วราโรหา ราชปุตฺตี ยสสฺสินี

พาหา ปคฺคยฺห กนฺทิตฺวา ตตฺเถว ปติตา ฉมาติ ฯ

ตตฺถ สามิกสฺสนฺติ โรทตีติ ภิกฺขเว สา มทฺที ตตฺถ วงฺกตปพฺพตกุจฺฉิยํ สานุปพฺพตานิ จ วนคหนานิ จ วิจรนฺตี ปริเทวิตฺวา ปุนาคนฺตฺวา สามิกํ นิสฺสาย ตสฺส สนฺติเก ฐิตา ปุตฺตานํ อตฺถาย โรทนฺติ น โข โนติ อาทีนิ วทนฺตี ปริเทวตีติ อตฺโถ ฯ อิติ มทฺที วราโรหาติ ภิกฺขเว เอวํ สา อุตฺตนมรูปธรา วราโรหา มทฺที รุกฺขมูลาทีสุ วิจรนฺตี ทารเก อทิสฺวา นิสฺสํสยํ มตา ภวิสฺสนฺตีติ พาหา ปคฺคยฺห กนฺทิตฺวา ตตฺเถว เวสฺสนฺตรสฺส ปาทมูเล ฉินฺนสุวณฺณกทลี วิย ฉมายํ ปตติ ฯ