อถ มหาสตฺโต กีทิสา มทฺทีติ ตสฺสา มุขํ โอโลเกสิ ฯ สา กึ มํ เทว มุขํ โอโลเกสีติ วตฺวา สีหนาทํ นทนฺตี อิมํ คาถมาห

โกมารี ยสฺสาหํ ภริยา สามิโก มม อิสฺสโร

ยสฺสิจฺเฉ ตสฺส มํ ทชฺชา วิกฺกีเณยฺย หเนยฺย วาติ ฯ

ตตฺถ ยสฺสาติ ยสฺส ตวาหํ โกมาริยา ภริยา โส ตฺวญฺเจว มม สามิโก อิสฺสโร จ นาม อาสิ ยสฺสิจฺฉติ ตสฺส วา ทเทยฺย ธเนน วา อตฺเถ สติ มํ วิกฺกีเณยฺย มํเสน วา อตฺเถ สติ หเนยฺย ตสฺมา ยํ โว รุจฺจติ ตํ กโรถ นาหํ กุชฺฌามีติ ฯ