อาโรเปนฺตุ ธเช ตตฺถ จมฺมานิ กวจานิ จ

วิปฺผาเลนฺตุ จ จาปานิ ทฬฺหธมฺมา ปหาริโน

ขิปฺปมายนฺตุ สนฺนทฺธา รเถสุ รถชีวิโนติ ฯ

ตตฺถ สนฺนาหยนฺตูติ อาวุธานิ สนฺนยฺหนฺตุ ฯ สฏฺฐีสหสฺสานีติ มม ปุตฺเตน สหชาตา สฏฺฐีสหสฺสา อมจฺจา ฯ นีลวตฺถาธราเนเกติ เอเก นีลวตฺถาธรา นีลวตฺถานิ นิวาสิตา หุตฺวา อายนฺตุ ฯ มหาภูตคณาลโยติ ยกฺขคณานํ อาลโย ฯ ทิสา ภนฺตุ ปวนฺตุ จาติ วุตฺตปฺปการา หิมวา วิย อาภรณวิเลปนาทีหิ โอภาสยนฺตุ เจว ปวายนฺตุ จ ฯ หตฺถิกฺขนฺเธหีติ เต หตฺถิคามิโน หตฺถิกฺขนฺเธหิ ขิปฺปมายนฺตุ ฯ ทสฺสิตาติ ทสฺสิตวิภูสนา ฯ อโยสุกตเนมิโยติ อเยน สุฏฺฐุ ปริกฺขิตเนมิโย ฯ สุวณฺณจิตฺรโปกฺขเรติ สุวณฺเณน ขจิตโปกฺขเร เอวรูเป จตุทฺทสสหสฺสรเถ โยชยนฺตูติ วทติ ฯ วิปฺผาเลนฺตูติ อาโรเปนฺตุ ฯ