เอวํ ราชา มคฺคาลงฺการํ วิจาเรสิ ฯ ตทา ชูชโกปิ ปมาณาติกฺกนฺตํ ภุญฺชิตฺวา ชิราเปตุํ อสกฺโกนฺโต ตตฺเถว กาลมกาสิ ฯ อถ ราชา ตสฺส สรีรกิจฺจํ การาเปตฺวา นคเร มหาเภริญฺจาราเปตฺวา เยเกจิ ตสฺส ญาตกา อิมานิ เต คณฺหนฺตูติ กิญฺจิ ตสฺส ญาตกํ อปสฺสิตฺวา สพฺพํ ธนํ ปุน อตฺตโนเยว โกฏฺฐาคาเร สํหราเปสิ ฯ อถ ราชา สตฺตเมว ทิวเส สพฺพา ทฺวาทสอกฺโขภิณี เสนาโย สนฺนิปตึสุ ฯ ราชา มหนฺเตน ปริวาเรน ชาลิกุมารํ มคฺคนายกํ กตฺวา เสนํ อาทาย นครา นิกฺขมิ ฯ

ตมตฺถํ ปกาเสนฺโต สตฺถา อาห

สา เสนา มหตี อาสิ อุยฺยุตฺตา สิวิพาหิณี

ชาลินา มคฺคนาเยน วงฺกํ ปายาสิ ปพฺพตํ