อมิตฺตหตฺถฏฺฐคตา ปสฺส ทุพฺพลฆาตกนฺติ ฯ

ตตฺถ อิงฺฆาติ โจทนตฺเถ นิปาโต ฯ นิสาเมหีติ สกเสนา วา ปรเสนา วาติ โอโลเกหิ อุปทาเรหิ ฯ อิเม นูน อรญฺญมฺหีติ อาทีนํ อฑฺฒเตยฺยคาถานํ เอวํ อตฺถสมฺพนฺโธ เวทิตพฺโพ ฯ มทฺทิ ยถา อรญฺญมฺหิ มิคสํฆานิ ลุทฺทกา วาคุราหิ ปริกฺขิปิตฺวา อถ วา โสพฺเภ ปาเตตฺวา ตาวเทว หนถ อเร ทุฏฺฐมิเคติ วิกฺโกสมานา ติปฺปาหิ มิคมารณสตฺตีหิ เนสํ มิคานํ วรํ วรํ หนฺติ หนนฺติ ฯ อิเม นูน ตเถว อมฺเห อสพฺภาหิ วาจาหิ วิกฺโกสมานา ติปฺปาหิ สตฺตีหิ หนิสฺสนฺติ มยญฺจ อทูสกา อรญฺเญ อวรุทฺธกา รฏฺฐา ปพฺพาชิตา วสาม เอวํ สนฺเตปิ ฯ อมิตฺตหตฺถฏฺฐคตาติ อมิตฺตานํ หตฺถฏฺฐคตา ฯ ปสฺส ทุพฺพลฆาตกนฺติ เอวํ มรณภเยน ปริเทวิ ฯ

สา ตสฺส วจนํ สุตฺวา เสนํ โอโลเกตฺวา สกเสนาย ภวิตพฺพนฺติ มหาสตฺตํ อสฺสาเสนฺตี อิมํ คาถมาห

อมิตฺตา นปฺปสเหยฺยุํ อคฺคิว อุทกณฺณเว