มทฺที จ ปุตฺตเก ทิสฺวา ทูรโต โสตฺถิมาคเต

วารุณีว ปเวเธนฺติ ถนธาราภิสิญฺจถาติ ฯ

ตตฺถ กนฺทนฺตา อภิธาวึสูติ กนฺทนฺตา อภิธาวึสุ ฯ วารุณีว ปเวเธนฺตีติ ยกฺขปวิฏฺฐา อิกฺขณิกา วิย ปเวธมานา ฯ ถนธาราภิสิญฺจถาติ ขีรธารา ทฺวีหิ ถเนหิ อภิสิญฺจถ ฯ

สา กิร มหนฺเตน สทฺเทน ปริเทวิตฺวา กมฺปมานา วิสญฺญี หุตฺวา ทีฆโต ปฐวิยํ ปตติ ฯ กุมาราปิ เวเคนาคนฺตฺวา มาตรํ ปตฺวา วิสญฺญิโน หุตฺวา มาตุ อุปริเยว ปติตา ฯ ตสฺมึ ขเณ ตสฺสา ทฺวีหิ ถเนหิ เทฺว ขีรธารา นิกฺขมิตฺวา เตสํ มุเขเยว ปวิสึสุ ฯ สเจ กิร เอตฺตโก อสฺสาโส นาภวิสฺส เทฺว กุมารา สุกฺขหทยา หุตฺวา อนสฺสึสุ ฯ เวสฺสนฺตโรปิ ปิยปุตฺเต ทิสฺวา โสกํ สณฺฐาเรตุํ อสกฺโกนฺโต วิสญฺญี หุตฺวา ตตฺเถว ปตติ ฯ มาตาปิตโรปิสฺส วิสญฺญิโน หุตฺวา ตตฺเถว ปตึสุ ฯ ตถา มหาสตฺตสฺส สหชาตา สฏฺฐีสหสฺสา อมจฺจา เต ทิสฺวา วิสญฺญิโน หุตฺวา ตตฺเถว ปตึสุ ฯ ตํ การุญฺญํ ปสฺสนฺเตสุ เตสุ เอโกปิ สกภาเวน สณฺฐาเรตุํ นาสกฺขิ ฯ สกลํ อสฺสมปทํ ยุคนฺตวาตมทฺทิตํ วิย สาลวนํ อโหสิ ฯ ตสฺมึ ขเณ ปพฺพตา นทึสุ มหาปฐวี กมฺปิ มหาสมุทฺโท สํขุภิ สิเนรุปพฺพตราชา โอนมิ ฉกามาวจรเทวโลกา เอกโกลาหลา อเหสุํ ฯ