โอกฺกากปุตฺโต ภทฺทนฺเต ตฺวํ นุ ทาโสติ มญฺญสิ ฯ

ยสฺส เธนุสหสฺสานิ สทา ทูหนฺติ วีสติ

โอกฺกากปุตฺโต ภทฺทนฺเต ตฺวํ นุ ทาโสติ มญฺญสีติ ฯ

เอวํ ตาย หิ ปญฺจหิ คาถาหิ มหาสตฺตสฺส ยเส วณฺณิเต อถสฺสา มาตา อยํ อจฺฉมฺภิตากถํ กเถติ อทฺธา เอวเมตนฺติ สทฺทหิตฺวา รญฺโญ สนฺติกํ คนฺตฺวา ตมตฺถํ อาโรเจสิ ฯ โส เวเคน ปภาวติยา สนฺติกํ คนฺตฺวา สจฺจํ กิร อมฺม กุสราชา อิธาคโตติ ฯ อาม ตาต อชฺชสฺส สตฺต มาสา อติกฺกนฺตา ตว ธีตานํ อาฬาริกตฺตํ กโรนฺตสฺสาติ ฯ โส ตสฺสา อสทฺทหนฺโต ขุชฺชํ ปุจฺฉิ ฯ สา ยถาภูตํ กเถสิ ฯ ตํ สุตฺวา ราชา ธีตรํ ครหนฺโต คาถมาห