ตตฺถ โยเชนฺตูติ หตฺถาโรหา หตฺถี อสฺสาโรหา จ อสฺเส กปฺเปนฺตุ ฯ รถํ สนฺนยฺห สารถีติ สมฺม สารถิ ตฺวํปิ ตํ รถํ สนฺนยฺห ฯ อาพนฺธนานีติ หตฺถิอสฺสรเถสุ อาพนฺธิตพฺพานิ ภณฺฑานิ คณฺหถ ฯ ปาเทสุสฺสารยทฺธเชติ รเถ ฐปิตธชปาเทสุ ธเช อุสฺสารยนฺตุ อุสฺสาเปนฺตุ ฯ โกสิโยติ ยสฺมึ อสฺสเม โกสิยโคตฺโต วสตีติ วทติ ฯ

ตมตฺถํ ปกาเสนฺโต สตฺถา อาห

ตโต จ ราชา ปายาสิ เสนาย จตุรงฺคินี

อคมาสิ อสฺสมํ รมฺมํ ยตฺถ สมฺมติ โกสิโยติ ฯ อยํ อภิสมฺพุทฺธคาถา ฯ