นนฺโท อชฺฌาวรํ กตฺวา อุปฏฺฐานาย ยาจติ ฯ

โย เจ อิจฺฉติ กาเมน สนฺตานํ พฺรหฺมจารินํ

นนฺทํ โว วรถ เอเกกํ มํ นนฺโท อุปติฏฺฐตูติ ฯ

ตตฺถ อริโยติ สุนฺทโร ฯ อริยสมาจาโรติ สุนฺทราจาโรวาสิ ชาโต ฯ พาฬฺหนฺติ อิทานิ ตฺวํ มม อติวิย รุจฺจสิ ฯ สุณาถาติ อมฺม ตาต ตุมฺเห มม วจนํ สุณาถ ฯ นายํ ภาโรติ อยํ ตุมฺหากํ ปฏิชคฺคนภาโร น กทาจิ มม ภารมตฺโต อหุ ฯ ตํ มนฺติ ตํ ภาโรติ อมญฺญิตฺถ ตํ มํ ตุมฺเห อุปฏฺฐิตํ สมานํ ฯ อุปฏฺฐานาย ยาจตีติ ตุมฺเห อุปฏฺฐาตุํ มํ ยาจติ ฯ โย เจ อิจฺฉตีติ มยฺหํ หิ ตฺวํ เม มาตรํ วา ปิตรํ วา อุปฏฺฐหาติ วตฺตุํ น ยุตฺตํ ตุมฺหากํ ปน สนฺตานํ พฺรหฺมจารีนํ โย เอโก อิจฺฉติ ตํ วทามิ กาเมน นนฺทํ โว วรถ ตํ มม กนิฏฺฐํ นนฺทํ โรเจถ ตุมฺเหสุ กํ เอส อุปฏฺฐาตุ อุโภปิ หิ มยํ ตุมฺหากํ ปุตฺตาเยวาติ ฯ