ปิตุ จ นนฺโท สุปฺปิโย ยํ นนฺโท นปฺปวเส ฆรํ

ลภตุ ตาต นนฺโท ตํ มํ นนฺโท อุปติฏฺฐตูติ ฯ

ตตฺถ มาลุเตริตนฺติ ยถา วาตาหตํ อสฺสตฺถสฺส ปลฺลวํ กมฺปติ เอวํ จิรสฺสํ นนฺทํ ทิสฺวาน อชฺช มม หทยํ กมฺปตีติ วทติ ฯ สุตฺตาติ ตาต โสณ ยทา อหํ สุตฺตาปิ สุปิเน นนฺทํ อาคตํ ปสฺสามิ ตทาปิ อุทคฺคา โหมีติ ฯ ภตฺตุ จาติ สามิกสฺส จ เม มยฺหญฺจ ปิโย ฯ นนฺโท โน ปาวิสี ฆรนฺติ ตาต ปุตฺโต โน นนฺโท ปณฺณสาลํ ปวิสตุ ฯ ยนฺติ ยสฺมา ปิตุปิ สุฏฺฐุ ปิโย ตสฺมา ปุน อิมมฺหา ฆรา นปฺปวเสยฺย ฯ นนฺโท ตนฺติ ตาต นนฺโท ยํ อิจฺฉติ ตํ ลภตุ ฯ มํ นนฺโทติ ตาต โสณ ตว ปิตรํ ตฺวํ อุปฏฺฐหิ นนฺโท มํ อุปฏฺฐหตูติ ฯ

อถ มหาสตฺโต เอวํ โหตูติ มาตุ วจนํ สมฺปฏิจฺฉิตฺวา นนฺท ตยา เชฏฺฐกโกฏฺฐาโส ลทฺโธ มาตา นาม อติคุณการิกา ตํ อปฺปมตฺโต หุตฺวา ปฏิชคฺเคยฺยาสีติ โอวทิตฺวา มาตุ คุณํ ปกาเสนฺโต เทฺว คาถา อภาสิ