ตตฺถ อนุกมฺปกาติ มุทุหทยา ฯ ปุพฺเพ รสททีติ ปฐมเมว อตฺตโน ขีรสงฺขาตสฺส รสสฺส ทายิกา ฯ มาตา ตนฺติ มม มาตา มํ น อิจฺฉติ ตํ วรติ อิจฺฉติ ฯ โคตฺตีติ โคปายิกา ฯ ปุญฺญูปสญฺหิตาติ ปุญฺญูปนิสฺสิตา ปุญฺญทายิกา ฯ

เอวํ มหาสตฺโต ทฺวีหิ คาถาหิ มาตุ คุณํ กเถตฺวา ปุนาคนฺตฺวา ตสฺสา อาสเน นิสินฺนกาเล นนฺท ตฺวํ ทุกฺกรการิกํ มาตรํ ลภิ อุโภปิ มยํ มาตรา ทุกฺเขน สํวฑฺฒิตา อิทานิ ตฺวํ อปฺปมตฺโต ปฏิชคฺคาหิ อมธุรานิ ผลาผลานิ มา ขาทาเปหีติ วตฺวา ปริสมชฺเฌเยว มาตุ ทุกฺกรการิกตํ ปกาเสนฺโต อาห

อากงฺขมานา ปุตฺตผลํ เทวตาย นมสฺสติ

นกฺขตฺตานิ จ ปุจฺฉติ อุตุสํวจฺฉรานิ จ ฯ