อสฺมากํ วธมญฺญาย อถตฺตานํ วธิสฺสติ ฯ

ปากหํสา หิ สุมุข สุเหมา เหมสุตฺตจา

โกญฺจีว สมุทฺทตีเร กปณา นูน รุจฺจตีติ ฯ

ตตฺถ ภายามีติ มรณโต ภายามิ ฯ สามายาติ สุวณฺณวณฺณาย ฯ ลกฺขณูรุยาติ ลกฺขณสมฺปนฺนอูรุยา ฯ วธมญฺญายาติ วธํ ชานิตฺวา มม ปิยสามิโก มาริโตติ สญฺญี หุตฺวา ฯ วธิสฺสตีติ กึ เม ปิยสามิเก มเต ชีวิเตนาติ มริสฺสติ ฯ ปากหํสาติ ปากหํสราชธีตา ฯ สุเหมาติ เอวํนามิกา ฯ เหมสุตฺตจาติ เหมสทิสสุนฺทรตจา ฯ โกญฺจีวาติ ยถา โลณสงฺขาตํ สมุทฺทํ โอตริตฺวา มเต ปติมฺหิ โกญฺจี สกุณิกา กปณา โรทติ เอวํ นูน สา โรทิสฺสติ ฯ