เอวํ โส สุมุขสฺส คุณํ วณฺเณนฺโต กเถสิ ฯ ตํ สุตฺวา ราชา สุมุขสฺส ธมฺมกถํ โสตุกาโม อโหสิ ฯ ลุทฺทปุตฺตสฺส สกฺการํ กโรนฺตสฺเสว สุริโย อตฺถงฺคมิโต ทีปา ปชฺชลิตา ฯ พหู ขตฺติยาทโย สนฺนิปติตา ฯ เขมา เทวีปิ วิวิธนาฏเกหิ ปริวาริตา รญฺโญ ทกฺขิณปสฺเส นิสีทิ ฯ ตสฺมึ ขเณ ราชา สุมุขํ กถาเปตุกาโม คาถมาห

กถนฺนุทานิ สุมุข หนุํ สํหจฺจ ติฏฺฐสิ

อาทู เม ปริสํ ปตฺโต ภยา ภีโต น ภาสสีติ ฯ

ตตฺถ หนุํ สํหจฺจาติ มธุรกโถ กิร ตฺวํ อถ กสฺมา อิทานิ มุขํ ปิธาย ติฏฐสิ ฯ อาทูติ กจฺจิ ฯ ภยา ภีโตติ ปริสสารชฺชภเยน ภีโต หุตฺวา ฯ