สพฺพรตฺตึ จินฺตยิตฺวาน มนฺตยิตฺวา ยถากถํ

กาสิราชา อนุญฺญาสิ หํสานํ ปวรุตฺตมนฺติ ฯ

ตตฺถ ยถากถนฺติ ยํกิญฺจิ อตฺถํ เตหิ สทฺธึ จินฺเตตพฺพญฺจ มนฺเตตพฺพญฺจ จินฺเตตฺวา มนฺเตตฺวา จาติ อตฺโถ ฯ อนุญฺญาสีติ คจฺฉถาติ อนุญฺญาสิ ฯ

เอวํ เตน อนุญฺญาโต โพธิสตฺโต ราชานํ อปฺปมตฺโต ธมฺเมน รชฺชํ กาเรหีติ โอวทิตฺวา ปญฺจสุ สีเลสุ ปติฏฺฐาเปสิ ฯ ราชา เตสํ กาญฺจนภาชเนหิ มธุลาชญฺจ มธุโรทกญฺจ อุปเนตฺวา นิฏฺฐิตาหารกิจฺเจ คนฺธมาลาทีหิ ปูเชตฺวา โพธิสตฺตํ สุวณฺณจงฺโกฏเกน สยํ อุกฺขิปิ ฯ เขมา เทวี สุมุขํ อุกฺขิปิ ฯ อถ เน สีหปญฺชรํ อุคฺฆาฏาเปตฺวา สุริยุคฺคมนเวลาย คจฺฉถ สามิโนติ วิสชฺเชสุํ ฯ