เต สพฺเพปิ อตฺตโน อตฺตโน ชนปทํ คนฺตฺวา มาตาปิตูนํ สิปฺปํ ทสฺเสตฺวา รชฺเชสุ ปติฏฺฐาย ปติฏฺฐิตภาวญฺเจว โอวาเท วตฺตมานภาวญฺจ ราชาโน ชานาเปตุํ ปณฺณากาเรน สทฺธึ ปณฺณานิ ปหิณึสุ ฯ มหาสตฺโต ตํ ปวุตฺตึ สุตฺวา อปฺปมตฺตา โหถาติ ปณฺณานิ ปฏิเปเสสิ ฯ เตสุ พาราณสิราชา วินา มํเสน ภตฺตํ น ภุญฺชิ ฯ อุโปสถทิวสตฺถายปิสฺส มํสํ คเหตฺวา ฐเปนฺติ ฯ อเถกทิวสํ เอวํ ฐปิตมํสํ ภตฺตการกสฺส ปมาเทน ราเคเห โกเลยฺยสุนขา ขาทึสุ ฯ ภตฺตการโก มํสํ อทิสฺวา กหาปณมุฏฺฐึ อาทาย จรนฺโต มํสํ อุปฺปาเทตุํ อสกฺโกนฺโต สเจ อมํสกํ ภตฺตํ อุปนาเมสฺสามิ ชีวิตํ เม นตฺถิ กึ นุโข กริสฺสามีติ จินฺเตตฺวา อตฺเถโส อุปาโยติ วิกาเล อามกสุสานํ คนฺตฺวา ตํมุหุตฺตมตสฺส ปุริสสฺส อูรุมํสํ อาหริตฺวา สุปกฺกํ ปจิตฺวา ภตฺตํ ปจิตฺวา ภตฺตมํสํ อุปนาเมสิ ฯ รญฺโญ มํสขณฺฑํ ชิวฺหคฺเค ฐปิตมตฺตเมว สตฺต รสหรณิสหสฺสานิ ผริ สกลสรีรํ โขเภสิ ฯ กึการณา ฯ ปุพฺเพ เสวนตาย ฯ โส กิร อตีตานนฺตเร อตฺตภาเว ยกฺโข หุตฺวา พหุํ มนุสฺสมํสํ ขาทิ เตนสฺส ตํ ปิยํ อโหสิ ฯ โส สจาหํ ตุณฺหีเยว ปริภุญฺชิสฺสามิ น เม อยํ อิมํ มํสํ กเถสฺสตีติ จินฺเตตฺวา สห เขเฬน ภูมิยํ ปาเตสิ ฯ นิทฺโทสํ เทว ขาทาหีติ วุตฺเต มนุสฺเส ปฏิกฺกมาเปตฺวา อหเมวสฺส นิทฺโทสภาวํ ชานามิ กินฺนาเมตํ มํสนฺติ ภตฺตการํ ปุจฺฉิ ฯ ปุริมทิวเสสุ ตยา ขาทิตมํสํ เทวาติ ฯ นนุ อญฺญสฺมึ กาเล อยํ รโส นตฺถีติ ฯ อชฺเชว สุฏฺฐุ ปกฺกํ เทวาติ ฯ นนุ ปุพฺเพปิ เอวรูปํ ปจสีติ ฯ อถ นํ ตุณฺหีภูตํ ญตฺวา สภาวเมว กเถหิ โน เจ กเถสิ ชีวิตนฺเต นตฺถีติ อาห ฯ โส อภยํ ยาจิตฺวา ยถาภูตํ กเถสิ ฯ ราชา มา สทฺทมกาสิ ปกติปจนมํสํ ตฺวํ ขาทิตฺวา มยฺหํ มนุสฺสมํสเมว ปจาหีติ อาห ฯ นนุ ทุกฺกรํ เทวาติ อาห ฯ มา ภายิ น ทุกฺกรนฺติ ฯ นิวทฺธํ กุโต ลภิสฺสามิ เทวาติ อาห ฯ นนุ พนฺธนาคาเร พหู มนุสฺสาติ ฯ โส ตโต ปฏฺฐาย ตถา อกาสิ ฯ อปรภาเค พนฺธนาคาเร มนุสฺเสสุ ขีเณสุ อิทานิ กึ กโรมีติ อาห ฯ ตฺวํ อนฺตรามคฺเค สหสฺสภณฺฑิกํ ขิปิตฺวา โย ตํ คณฺหติ ตํ โจโรติ คเหตฺวา มาเรหีติ ฯ โส ตถา อกาสิ ฯ อปรภาเค ภเยน สหสฺสภณฺฑิกํ โอโลเกนฺตํปิ อทิสฺวา อิทานิ กึ กโรมีติ อาห ฯ ยทา มชฺฌิมยาเม เภรีเวลาย นครํ อากุลํ โหติ ตฺวํ เอกสฺมึ ฆรสนฺธิมฺหิ วา วีถิยํ วา จตุกฺเก วา ฐตฺวา มนุสฺเส มาเรตฺวา มํสํ คณฺหาหีติ ฯ โส ตโต ปฏฺฐาย ถูลมํสํ อาทาย คจฺฉติ ฯ เตสุ เตสุ ฐาเนสุ กเฬวรานิ ทิสฺสนฺติ ฯ นครํ อากุลํ โหติ ฯ มม มาตา น ปญฺญายติ มม ปิตา น ปญฺญายติ มม ภาตา ภคินี จ น ปญฺญายตีติ มนุสฺสานํ ปริเทวนสทฺโท สุยฺยติ ฯ