ตตฺถ กาฬาติ กาฬหตฺถิ ฯ เอวเมวนฺติ เตชวนฺเตน เสนาปตินา อนุยุญฺชิโต ราชา มุสา วตฺตุํ อสกฺโกนฺโต เอวมาห ฯ ตตฺถ ตถาติ อิทํ ปุริมสฺเสว เววจนํ ฯ มม อตฺถนฺติ มม วุฑฺฒึ ฯ กโรนฺตสฺสาติ กโรนฺตํ ฯ กิเมตนฺติ กสฺมา เอตํ ปริภาสสิ ฯ

อถ ราชา อโห ทุกฺกรํ กโรสีติ กาฬหตฺถิ ตฺวํ นาม อญฺญํ โจรํ อคเหตฺวา มม เปสการํ คณฺหาเปสีติ ตสฺส ภยํ ชเนนฺโต กเถสิ ฯ ตํ สุตฺวา เสนาปติ อยํ สเกเนว มุเขน ปฏิชานาติ อโห สาหสิโก เอตฺตกํ กาลํ มนุสฺสมํสา เอเตน ขาทิตา วาเรสฺสามิ นนฺติ จินฺเตตฺวา อาห มหาราช มา เอวํ กริ มา มนุสฺสมํสํ ขาทถาติ ฯ ราชา อาห กาฬหตฺถิ กึ กเถสิ นาหํ อิโต วิรมิตุํ สกฺโกมีติ ฯ เทว สเจ ตฺวํ น วิรมิสฺสสิ อตฺตานํ รฏฺฐญฺจ ตฺวเมว นสฺสิสฺสสีติ ฯ เอวํ นสฺสนฺโตปิ อหํ ตโต เนว วิรมิตุํ สกฺโกมีติ ฯ ตโต เสนาปติ ตสฺส สญฺญาปนตฺถาย วตฺถุํ อาหริตฺวา ทสฺเสสิ ฯ

อตีตสฺมึ หิ กาเล มหาสมุทฺเท ฉ มหามจฺฉา อเหสุํ ฯ เตสุ อานนฺโท อุปนนฺโท อชฺโฌหาโรติ อิเม ตโย มหามจฺฉา ปญฺจโยชนสติกา ติมิงฺคโล ติมิรมิงฺคโล มหาติมิรมิงฺคโลติ อิเม ตโย มหามจฺฉา สหสฺสโยชนิกา โหนฺติ เต สพฺเพปิ ปาสาณเสวาลภกฺขา อเหสุํ ฯ เตสุ อานนฺโท มหาสมุทฺทสฺส เอกปสฺเส วสติ ฯ ตํ พหู มจฺฉา ทสฺสนาย อุปสงฺกมนฺติ ฯ เอกทิวสํ สพฺเพสํ ทฺวิปทจตุปฺปทานํ ราชา ปญฺญายติ อมฺหากํ ราชา นตฺถิ มยเมกํ ราชานํ กริสฺสามาติ จินฺเตตฺวา สพฺเพ เอกจฺฉนฺทา หุตฺวา อานนฺทํ ราชานํ กรึสุ ฯ เต มจฺฉา ตโต ปฏฺฐาย ตสฺส สายํ ปาโต อุปฏฺฐานํ คจฺฉนฺติ ฯ อเถกทิวสํ อานนฺโท เอกสฺมึ ปพฺพเต ปาสาณเสวาลํ ขาทนฺโต มจฺฉํ อชานิตฺวา เสวาโลติ สญฺญาย เอกํ มจฺฉํ ขาทิ ฯ ตสฺส ตํ มํสํ สกลสรีรํ ฉาเทติ ฯ โส กึ นุโข อิทํ อติวิย มธุรนฺติ นีหริตฺวา โอโลเกนฺโต มจฺฉขณฺฑํ ทิสฺวา เอตฺตกํ กาลํ อชานิตฺวา ขาทามีติ จินฺเตตฺวา ตโต ปฏฺฐาย สายํปิ ปาโตปิ มจฺฉานํ อุปฏฺฐานํ อาคนฺตฺวา คมนกาเล เอกํ เทฺว มจฺเฉ ขาทิสฺสามิ ปากฏํ กตฺวา ขาทิยมาเนสุ จ เอโกปิ มํ น อุปสงฺกมิสฺสติ สพฺเพปิ ปลายิสฺสนฺติ ปฏิจฺฉนฺโน หุตฺวา ปจฺฉา โอสกฺกิโตสกฺกิตํ ปหริตฺวา ขาทิสฺสามีติ ตถา อกาสิ ฯ เต มจฺฉา ปริกฺขยํ คจฺฉนฺตา จินฺตยึสุ กุโต นุโข ญาตีนํ ภยํ อุปฺปชฺชตีติ ฯ อเถโก ปณฺฑิตมจฺโฉ มยฺหํ อานนฺทสฺส กิริยํ น รุจฺจติ ปริคฺคณฺหิสฺสามิ นนฺติ มจฺเฉสุ อุปฏฺฐานํ คเตสุ อานนฺทสฺส กณฺณปตฺเต ปฏิจฺฉนฺโน หุตฺวา อฏฺฐาสิ ฯ อานนฺโท มจฺเฉ อุยฺโยเชตฺวา สพฺพปจฺฉโต คจฺฉนฺตํ ขาทิ ฯ โส ปณฺฑิตมจฺโฉ ตํ กิริยํ ทิสฺวา อิตเรสํ อาโรเจสิ ฯ เต สพฺเพปิ ภีตตสิตา ปลายึสุ ฯ อานนฺโท ตโต ปฏฺฐาย มจฺฉมํสคิทฺเธน อญฺญํ โคจรํ น คณฺหาติ ฯ โส ชิฆจฺฉาย ปีฬิโต กิลมนฺโต กหํ นุโข อิเม คตาติ เต มจฺเฉ ปริเยสนฺโต เอกํ ปพฺพตํ ทิสฺวา มม ภเยน อิมํ ปพฺพตํ นิสฺสาย วสนฺติ มญฺเญติ ปพฺพตํ ปริกฺขิปิตฺวา อุปธาเรสฺสามีติ นงฺคุฏฺเฐน จ สีเสน จ อุโภ ปสฺเส ปริกฺขิปิตฺวา คณฺหิ ฯ ตโต สพฺเพ อิธ วสิสฺสนฺติ กุโต ปลายิสฺสนฺตีติ ปพฺพตํ ปริกฺขิปิตฺวา อตฺตโน นงฺคุฏฺฐํ ทิสฺวา อยํ มจฺโฉ มํ วญฺเจตฺวา ปพฺพตํ นิสฺสาย วสตีติ กุทฺโธ ปญฺญาสโยชนมตฺตํ สกนงฺคุฏฺฐํ ทฬฺหํ อญฺญํ มจฺฉนฺติ สญฺญาย คเหตฺวา มุรุมุรายนฺโต ขาทิ ฯ ทุกฺขา เวทนา อุปฺปชฺชติ ฯ โลหิตคนฺเธน มจฺฉา สนฺนิปติตฺวา ลุญฺจิตฺวา ขาทนฺตา ยาว สีสํ อคมํสุ ฯ มหาสรีรตาย ปริวตฺเตตุํ อสกฺโกนฺโต ตตฺเถว ชีวิตกฺขยํ ปาปุณิ ฯ ปพฺพตราสิ วิย อฏฺฐิราสิ อโหสิ ฯ อากาสจาริโน ตาปสปริพฺพาชกา มนุสฺสานํ กถยึสุ ฯ สกลชมฺพูทีเป มนุสฺสา ชานึสุ ฯ