อลทฺธา มนุสฺสมํสํ มญฺเญ เหสฺสามิ ชีวิตนฺติ ฯ

ตตฺถ ตสฺสาติ ตสฺส สุชาตสฺส ฯ

อตีเต พาราณสิยํ สุชาโต นาม กุฏุมฺพิโก โลณมฺพิลเสวนตฺถาย หิมวฺนฺตโต อาคตานิ ปญฺจ อิสิสตานิ ทิสฺวา เต อตฺตโน อุยฺยาเน วสาเปตฺวา อุปฏฺฐหิ ฯ ฆเร จสฺส นิจฺจํ ปญฺจสตมตฺตา ภิกฺขา อเหสุํ ฯ เต ปน ตาปสา กทาจิ ชนปเท ภิกฺขาย จรนฺติ มหาชมฺพูเปสึปิ อาหริตฺวา ขาทนฺติ ฯ เตสํ ชมฺพูเปสึ อาหริตฺวา ขาทนกาเล สุชาโต จินฺเตสิ อชฺช ภทนฺตา ตโย จตฺตาโร ทิวสา อนาคจฺฉนฺตา กหํ นุโข คตาติ ฯ โส ปุตฺตํ อตฺตโน องฺคุลิยํ คาหาเปตฺวา เตสํ ภตฺตกิจฺจกาเล ตตฺถ อคมาสิ ฯ ตสฺมึ สมเย มหลฺลกานํ มุขวิกฺขาลนอุทกํ ทตฺวา สพฺพนวโก ชมฺพูเปสึ ขาทติ ฯ สุชาโต ตาปเส วนฺทิตฺวา นิสินฺโนว กึ ภนฺเต ขาทถาติ ปุจฺฉิ ฯ นวโก มหาชมฺพูเปสึ ขาทามิ อาวุโสติ ฯ ตํ สุตฺวา กุมาโร ปิปาสํ อุปฺปาเทสิ ฯ อถสฺส คณเชฏฺฐโก โถกํ ทาเปสิ ฯ โส ตํ ขาทิตฺวา รเส พชฺฌิตฺวา ชมฺพูเปสึ เม เทถ ชมฺพูเปสึ เม เทถาติ ปุนปฺปุนํ ยาจิ ฯ กุฏุมฺพิโก ธมฺมํ สุณนฺโต ปุตฺตก มา วิรวิ เคหํ คนฺตฺวา ขาทิสฺสสีติ ตํ วญฺเจตฺวา อิมํ นิสฺสาย ภทนฺตา อุกฺกณฺเฐยฺยุนฺติ ตํ สมสฺสาเสนฺโต อิสิคณํ อนาปุจฺฉิตฺวาว เคหํ คโต ฯ คตกาลโต ปฏฺฐาย จ ตสฺส ปุตฺโต ชมฺพูเปสึ เม เทถาติ ปริเทวิ ฯ อิสโยปิ อิธ จิรํ วสิมฺหาติ วตฺวา หิมวนฺตเมว คตา ฯ อาราเม อิสโย อปสฺสนฺโต ตสฺส อมฺพชมฺพูปนสโมจาทีนํ เปสิโย มธุสกฺขรสํยุตฺตา อทาสิ ฯ ตาปิสฺส ชิวฺหคฺเค ฐปิตมตฺตาว หลาหลวิสสทิสา โหนฺติ ฯ โส สตฺตาหํ นิราหาโร หุตฺวา ชีวิตกฺขยํ ปาปุณิ ฯ

ราชา อิทํ การณํ อาหริตฺวา ทสฺเสนฺโต เอวมาห ฯ ตสฺส สงฺขเยติ ตสฺสา ชมฺพูเปสิยา ขเย อญฺญํ อาหารํ อนาหริตฺวา มโต ฯ ภกฺขนฺติ ขาทนียํ ฯ รสุตฺตมนฺติ อุตฺตมรสํ ฯ เหสฺสามีติ ชเหสฺสามิ ฯ หิสฺสามีติปิ ปาโฐ ฯ